Гьер хизандиъ дахьичинра хIапаяри дузди ухIая чиппин хулариъ гитан. Инсанарин хабарарилди гитанар авала вегьши хIейванар и. Хабди ерчIу агъзурна гIифу верш исан удигьди мебур хулахъди вардиш акьуна хулан хIейванар хьуне.

Ме кардин гереквел хьуне инсанарин арайиди цивилизация адина, чиппис хал-мукь акьуна саусал экьвас ягIархьихаб. Джил зад узуна мал-къара ухIас алучIугуна, мебурихъ кьур, IуькI-кьал алтухъ хьуне. Мебур афухIубан загьматра ппара хьуне. Ме Iелеттар, сумар, кьалар Iулари пуч дакьас зейдайи кумак вейи гитанарикес. Амма сур хIуькуматариъ гьалра аме вехIшибура.

Агугуна мебур сур чуьлле, сур гъазе улара ай ппара батIарттаре, ке Iайи, бицIи чаркквар, хъуландегьен хъара ул алттивас кканвейдава. Уч ме ппара мерттефра э зурбара. Мез атай Iуьрччанде ме учин сурат, кьвачIа. Нагахь бетIур ая раккагьас хулади ачеверегъилди хьучин учин беIерик кея тIакьвар ттуттуна мертт аркьа ме.

Зурбавелдихъас гъургъучин, джуьре нахширарис хIейванарис хулаъ вардиш хьихаб байирдиъ читин ве, е луькIе, е илгва. Гитанис бала вейдава. Фидегьен хулахъди вардиш ичира чIириъра рехIетти учин кIил аттива. Илан, кабалай, Iул хъара джуьре нахширара хулахъди багу хьас артайдава.

Ме кидавай, хIаттари агъафе гитан итта мукьуйил экьуна сагъ аркьа пуна итта ус. Гьаме хIекь ахттилат суман э. Эесси экьугуна гитан адина ахъухьа мил, ягъниш кея мукь ягIаф суман.

Диревелра ппара э гитанин, гьавайиас алархьайчин хIеракат акьуна беIерилди гъурзанде, нагагра кегьей гIунар ирхIайдава, уларин Iеквра алтухъе, ниъра тегIди ве мис. МучIе Iуьш ичира ацIуна гагьттисттегьен агьутIуна эркьва, эгена учис улун ниъ хьуна, ун унихьучин.

ЯIанин хIисабилди гитанин Iуьмур цIаIу-цIеякьу ис э.

Ая хье мисалабур. Гъвара пуфе агъа, гьаме хулаъ ери кIиркIра ери сус хьучин идже хьаси, мебури зас гьертти са кьурц гунин йиси зе фун ацIас.

Гитанин матлаб и агъа, хулаъ сатти са Iуьссе сукъур инсан ахьеб, гин гъилив фаяф фаттивуна учис IуьтIанас.

Амма хье диндиъ ппара хIулмат ая гитанис.

Салихат Малагусейнова