https://www.instagram.com/p/BnOxNQ7lzda/?taken-by=gazeta_vestiagula
ХIурариъ гьучархьа сасра читинвеларихъай ахиран вахттари иттал суман алчархьуна ая шиниквар идилгванди мактабар хъикIубар. Дагъусттандин ацIуна хIурарис кедишагъелди ая ге иттал.
Хьехъас фи хьин агъаф, Iуьрусаттихъ газаракегьей дивуна ая хIурариас айчIуна вей аягуна инсанар. Ая читинвелара рекъерихъас, курарихъас, цIуьппе Iурдарихъас, амма айчIуна ушуттаринра чулариди дуламиш акьас рехIет вейдава.
Гьер инсан учин Iуьмурдин эеси э, учис иджи ягIа учин кар, кьабахъ ягъа пушмал дахьас. Райондин центрабуриъ кидавай хьес ягIа хIуькуматин фи курар авей ичин хIурариъ – ке ппара курар ирцIанф мактаби э. Мактабариъ кар акьас мегIелимар аве, мактаб гъузуна авереф, чвас ягIай ичин, шиниккварил э.
Шиникквар вей-вей чIукь хьугуна э мактабар хъикIаф. Суал йес хьасе фас э пуна мегIелимар аягуна шиникквар чIукь вереф?
Садпеф, мактабуриъ кар аркьай аяф хIа пай пенсибур гъуланди ая яш хьуна ая мегIелимар э. Гебурин шиникквар хIа хьуна хуттулара хьуна аве, амма мактаб илгванас пуна, чиппин зарплата датIас пуна фикир акьуна са хуттул дехIера гъас алучIайдава чаб кар аркьай ая мукьуйиди.
Iудпеф, курар авейчира, кканчин меIелимдинф, кканчин ге пуларин къайдабур ая джуре кар, хIа пулар ккандира, хIурариъ вере джуре читинвеларикк хIав ккидавай ве рехIетин Iуьммурарихъас руцас.
Хье райондин Iегурара агвар аркьай ая хьес мактаб хъикIугъилди хIура ккеттархьаф. Iемухъарин хIур хIаф давайчира инсанара уйи, гьуркIу мактабара уйи. Иджи хъучушуб дахьуна, мактаб хъикIуна хIуринра фера андава пас хьасе, са якьу-гIифу хал кидавай. Шиникквар адава хал кIина хал суман, шиникквар адава хIур ккеттархьа.
Ахиран исари Iемухъарин хIур суман, къуругь-дерейиъ ая агъул чIала гъургъай ая гIифу хIурикес Iу хIуриъ мактабар хъикIуна малар ухIай аме яш хьу инсанардала андава.
Гебур гьинара духIуба аркьаф адава, мактаб адава хIуриди джигьилара адесттава. Iемухъара, Курдалара, Уккудеяра макктабар андава хIурар хьуна ая. ХIурарин мактабар хъикIай, шагьурариъ ая мактабариъ мукьар гьуркIай адава.
Хье райондиъ ягIайин ягъас хъуттурфучин ая са-Iу хIурар мактабариъ шининкквар чIукь хьуна аяттар, ахир кIил хъикIас гучIа. Хье райондин хIаттира еб ицIанди ая ге кардис, амма зун айчIуна весе агъа инсандис хьевас акьас вереф фера адава. ЙиркIурас дард ве, ве уларригъ аргвай-аргвай ккеттархьагуна хIурар. Хье миллатра бицIиф идегуна, шагьурариди, чулариди айчIуна ушуттар хIурариас, чиппин чIалра хум ушуна шимаригI хьед суман гIачаве. Мактабар лирханди амедегьен гагьди хIурариккра джан кимилгванде.
К.Мирзоев
