Инсандис кеидже къулугъ учин загьматилди къазамиш акьуб. Гиштти хье диндиъра агъа хьес. Авалан вахттари инсан Iурд, гIул дагъай лиханди, кIил гъадивас маджал адавай. Загьматихъ хъуттурфуна учин хIуьлалин ризкьра вей и.

Гьал вахттар духIуба хьуна ая, инсандис лиханас кканди андава, джигьиларис генара. Алтухъ пулар айчира, адавайчира хIуькуматтин курар джаллабурис гьуркIайдава. ХIуькуматтин кардил алеф э агъай йицIу агъзура кехIей дагъулан джигьил идемар ая. Миштти идегуна инсан тич мич йирхIуна кканве дуламиш хьас. ЯгIа пасе хьин хье дарарин гIедатарихъас хIуб ухIубахъас, узубахъас .

Хье Агъул райондиъ удигь исари са кьушандере дала адавуйи хIуппар узай нис аркьаттар. Ахиран исари загьмат кея кар ичира муфеIет кеттивас вере  кар идеф ягIай Агъулаъ хIуппар узай нисар аркьаттар ппара хьуна ая. Ме сеIети Iари Типпигъарин хIуриъ гIифу убади узая хIуппар.

Авазар уйи ЧIааринттарисра узас кканди ая агъай. Узай, идже аркьа. Хьибу- якьу вазала загьмат дивуна ацIуна хайр ве. Кар даркьай эркьвай далара, лихуб инсандис ухшар ве. Игитар, зурбабур, муфеIет кеттивас ягIаттар хъара ппара хьурай хье халкьдигI.

 

К. Мирзоев