Вилаятиъ ая регионарикес ке ппара гьер джурейин миллатар ешамиш веяф Дагъусттандиъ э. Мисаъ ая лап хIа миллатара, ая бицIиттара. Миштти бицIи милаттаригI гIая агъулара. Гьер милаттихъ хъая хIа хьунанар хъая инсанар. Хье район бицIи ичира, инсанара ппара адавайчира, сасра миллатарилас зурба инсанар чIукь адава.
Сад ме Агъуларин зурба-кьуват хъая инсанарикес Гаджиомаров Магомедали Наврузович э. Хуная ме 1975 иса Гъудагъарин хIуриъ Агъуларин райондиъ. Махьтабиъ ами димари ме гъавурдиъ уйи хурубахъ хъучархьаф адаваф. ДехIела махьтаб ккиркIуфна сад, са фикира дакьуна, ме учIуне Махачкалайиъ Дагестанский государственный технический университетиъ. Ме университет хуруна ккиркIуаб, хьуне мис высшее техническое образование. Амма мисаъ хурая гагьди, мин ягъди фикирдиъ уйи сасра усра хурас кканде пуна. Фас пичин, мин мус хьичира гIешкъ уйи духттурарин курсариъ. Университет ккиркIухаб, ме учIуне Пятигорская фармацевтическая академиди, хьуне микес провизор. Мисаъ хурая гагьди, мин ягъди йиркIураъ авейи фикир, яраб фиштти кумак аркьахьан инсанарис пуна, иттаттарис варха рекъ дайирхIуна, ккане руб-дарман фачархьас аркьагъилди. Гьемишттин фикирар аркьай ме рукьуне маслихIетихъди дархъагъилди гьер усариъ аптекабур. Гьерттис багу верегъилди, кьиматарилдира алтухъ багьа давагъилди. 2000 исалас башламиш акьуне ми дархъай Махачкалайиъ, Дербентиъ, Каспийскдиъ, Хасавюртиъ 36.6 агъа аптекабур. Ме кардигI ая гагьди мил алчадархье кар, читинвел адава. Михъди кумак кканди ппара талIаб аркьай вейи инсанара. Учивас верегъилди, аттрукьагъилди гьерттис аркьай кумак, мусра инсанаригьас гьайчIуфдава. Мус хьичира мис хабарди авейи райондин, халкьдин читинвеларихъас, дарди-хIеларихъас. Вархал чукIуна, гьайчIуна инсанаригьас экьвас мин йиркIура кьабул акьуфдава.
2018 иса гьикуна уйи заявка Гъудагъарин махьтаб гIачихь пуна нацпроектигI «150 школ» агъаттигI. МисагI гIачихьастти ахттармиш аркьайи махьтабин гьавара, хурая шиниккварин санра, махьтаб акьуна исра, хъара кканди авейи ппатталас кумак аркьа инсанра. Те иса кумак аркьа инсан арайил дахьуна, мебурин махьтаб гIачархьуна адава ме нацпроектигI.
Ме кардин читинвел райондин хIатти Закир Каидова арайил акьуне совещанил, Гъудагъарин махьтабис кумак кканди ая пуна, нацпроектигI гIачихьас. Са вахттунилас чиппин кумак тахмиф акьуне Курбанмагомедов Нариман Нажмудиновичара, ми кумак акьуне махьтабин ибгIавелдис паровое отопление акьас. Хабди Магомедали Наврузовичанра, Шамиль Гасаниевичанра гIешкъ хьуне кумак акьас. Мебурин кумакилди дивуни Iеквар, батIар акьуне джигагьин гIана-багвар, йирхIуне цаларис кардунар.
Гьер багухъди учивас аттрукьа кумак аркьа вахттуни, мин фикирарилди, ппара курар арайил акьас йиркIураъ уйи. Дуньяйил коронавирус агъа азар гъуту арайи, ми учин багухъас ппара кумак акьуне райондинра Махачкалайин больницабурис. Магомедали Наврузовича фатуне учин аптекабуриас ацIуна руб-дарманар, маскабур, гъилар дезинфекция аркьа шейэр, иттал арайил аркьа тестар. Хабди микес хьуне кандидат в депутаты Народного Собрания РД «Единая Россия» агъа партин багухъас. Мисаъ кар аркьа гагьди, михъди вейи инсанар, гьертти чиппин миннат-тIалаб фай. Гьемисал гъавурдиъ архьуне ме, хIуриъ, райондиъ ппара акьуна кканди аме курар, арайил аркьа читинвелар аяф. 17-19 сентябрьди кIилди райондиъ хьуне сесар ирцIан маджлис. Мисаъ хIа пай джемеIетин разивел фай гIаттивуне Магомедали Наврузович депутатвелди Народный Собранин Агъул райондин ппаттаас. Ме гIаттивуна са вахттра давайчира, арайил акьуна курарин сан чIукь дава. Ппара читинди уйи мегIелимарис кар акьас махьтабариъ герек иде шейэр адавай. Мебури тIалаб акьуне депутатикес чиппис кумак акье пуна гъушанас. Алтухъ вархалди дадивуна, мебурин тIалаб арайил акьуна, Магомедали Наврузовича гьикуне интерактивный доскабура, принтерара Типпигъаринра, ЧIааринра, Курагъарин махьтабарис. ЦIае исан хIаягъасра джалла райондин еридпе классихъди рукьуна махьтабариъна садикариъ ая шиниккварис учикес гьикуне савкьатар. Ке хIа саваб э шиниккварин йиркIв гъушуна шад акьуб.
«Арайил акьас йиркIураъ ая курар ппара аме, ме багухъди мугъатилди кар акьуна кканде»,- агъа Агъуларин депутати Магомедали Наврузовича.
Луиза Гусукаева
