Дагъусттандин валаятиъ ая хьер джурейин миллатар. Гьер миллатихъ хъая чиппин иде хIаягъар. Амма са хIаягъ аркьа Дагъусттандин кьибла багухъ хъая хIалкьари. Ме ягъ гьер хIуриъ аркьа гьергъилди. Агъулар Хьидин Iуьшас хIезур вейи вахтт ккими.

МехIелабурин арайиъ бехIс авейи, нае мехIелайин цIа хIа вейчин. Салар ацIас аркьайи Хьидин Iуьш хъучаверегунас завал аркьайи хIезимаяр, сумар. Сагелай гьертти учин мехIелайиъ аркьафи цIа. Хабди хъучучIафи багулифая мехIелабуриъди, куншибурихъди вес мубарак акьас.

Джигьилар алдишайи цIайилас, шиникквари тамашабур аркьайи гIатIиршанди са-сайигI шаIар. Муулин макьамихъди аркьайи лехъунар. Ме ягъас аркьафи экIен нирхIин аш, куче-муссу. Верефи сусарис ишанар кихьас. Гъарефи нирхIин ашна кьумашин парча.

Хьидин Iуьш алттархьехаб, кьабахъ ягъа багамикестти верефи ккитIуна вецара садпе язанин хул акьас. Ме вазифа ирцIанфи хIуриъ ая хIа идемилди, мехIсулар ппара хьас. ХIа инсанар хуланра, хIураринра баракатар э.

Агьал Хьидин Iуьшан хIаягъ аркьа джурегъилди. Ягъуй башламиш аркьа вецар, гъурур алчикай, хIейванар гьартай, шиниккварин гьуккубар, гъванар ахъатубар, тIил хъучадивубар. Аркьа батIар макьамар. МучIе хьехаб кихьа цIа.

Типпигъаъ джигьилар ягъуй димари агъаве хIа дараъди. Майданил цIабурихъди инсанар завал хьехаб мебури адарта цIара кихьуна хIа дараас фурар. Мебурин арайиъ аве бехIс найин фур вархайихъди рукьайчугас. Вахттар алттвередегьен гIедатар духIуба вея. Хьин хьефас вередегьен ухIас алучIуна кканде авалан гIедатар.

Луиза Гусукаева