ХIа идеми ревакцинация акьуне

Агьал хье дуьяйиъ ая итталин четинвеларихъас хьес гьер ягъа унихьая  телефонариас, интернетариас, телевизорариас. Хъара хьес аргва сан иттаттарин, кIеттарин, руб йирхIуттарин  духIуба ве ягъалас ягъа. Са ягъа чIукь хьучира, сасра ягъа хаб ппара агвар аркьа. Миштти идегуна,  хье хIаттари, духттурари  тIалаб аркьая эхIттият хьудигьен ппара  акьуна кканде агъа.  ХIапай тIалаб аяф  бицIи яш хьуная инсанарис, хабди са ерхьцIур хъара вартт исар хьуаттарис, хронический итталар кеттарис. Хье райондиъ агьал хIапай руб йирхIу инсанарин сан аяф 60 ис хьуттарин, хъара ревакцинация акьуттарин гьер идарабуриас.

Ме кардихъас чин са Iу суал алихьуне Каидов Рамазан Раджабовичас, фиштти ми кьаст акьунайчин ревакцинация акьас ме коронавирус агъа итталин. 

— Зун дуламиш вея Агъул райондиъ кьушандерейин лап те кIилиъ ая Буршагъ хIуриъ. Миштти пасе зун чвас ме кардихъас, джалабурин хиял вереф хьасе варха хIурариъ ая инсанарис фиттикесра хабар адаф суман. Амма  бицIи хIурин инсанар ке удигьай мишттин курарис зурбавелди чалишмиш вереф.Час че хIурин кавхайи вахтт гIартай вахттунис хабар ирцIанди агьал ая итталин четинвеларихъас, нагаь руб йирхIас районди вес мункинвел адаттарис транспортин кумак аркьа. Че шиникквар ая шагьурариъ гьер джурайин курарил алдеттар. Гебури чахъас гъам аркьа че сагъвелдин, хъара тIалаб аркьа вахттуни руб йирхIубан, фас э пичин, садпе кумак э ме итталис. ДегхIела зун, хIуькуматин кардил алдайчира, кьаст акьуна йирхIуф ме итталин руб. ХIурари агьал, чвас аргвая, инсанар ппара андава. Гьеме ая са  Iу яш хьу инсанарихъасра фикир акьуна, зе джандисра кумак хьурай пуна йирхIуне зун ке удигьай Iу компонент ая руб ме итталин. Мегелай зун акьуне ревакцинация са компонентин руб  «Спутник Лайт» агъаф. Я удигьай, я ме Iуд пегелай зас са хабар йиндава ме руб йирхIубан, — пуне Каидов Рамазана.

Наибет Гасукаева