Хе чIал – гьер са халкьдин девлет э!

Iу агъзурпе исалас мич э хье ватандиъ хе чIалан хIа ягъ къаршиламиш аркьай. Джалла дуьяйиъ аядегьен инсанарихъ хъая учин хе чIал. Гьер са нахширихъра кегьей, учин микьдарихъ хъуттудурфуна, хъая учин чIал. Гьерттис учин чIал багьа э. Хье валаят ацIуна миллатарин макан э. Вершна хьибцIур чIалалди гъургъая мисаъ. Гьер са миллат — ме тикрар дава, тарих, гIедат, гьелбетта чIал э. Iари чIалалди ягIар акьас ве гьер са халкьдин Iуьмурдин шартIар.

Зе хе чIал — зе халкьдин руьхIдин ирс э! Гьер са чIал кIилдин дуьнья хIисабе! Ме Iари гъургъуб дава, халкьдин джан але руьхI, гин йиркIуран Iуьр, фикир, захрафа э.

Нае миллатихъас кканчира фикир акьу вегIдайи, ке удигьай келлайиъ ачархьаф мебурин чIал э. ЧIал гьер са халкьдин йиркIв э. Ме йиркIв адавахаб, миллатра ахьасттава. ДехIела хьин мусра хье хе чIал хум гьатуна ккандава. Гьер са миллатин, гьер са несилдин хIа вазифа э, учин чIал хIуна хьасмиде несиларилди аманат суман рукьас акьуб. Фас пучин, чIал хум вередегьен бицIи- бицIи миллатра гуланасе. 

Фикир ве фиттис э мидегьен Iайи чIалан лазимвел, гьакIан инсанар чаб чиппихъай гъургъас дала эв ме герек идеф пуна. Амма ме фикир цIаку фикир э. 

ЧIал миллатин бина э. Хье чIал, хье девлет, хье дадарин дадарин, алайшу несиларин лап багьа савкьат, аманат э хьехъди рукьуф. 

Агъуларин халкь ке бицIи халкьарикес сад э. Хье мурад, матлаб э хье халкь ппара хьеб. Ме кардихъ хъуттурфуна, хьин Iудтти цIуппи алгъузуна кканде чIал дагуланас, дадарин аманат ухIас. 

Ттиъ садпе декабрьдис «Агъуларин хабарар» газитин 70  ис хьуне. Газитин редакци, ме ягъанис бахш акьуна, арайил акьуне «Агъуларин захрафа» агъай шигIирарин конкурс. Садпеттилас еридпе декабрьдилдегьен махьттабариъ хура шиникквари гьикуне видеороликар хье чIалан шигIирар хурай. КIилди хьуне ерчIцIур ишттаракчи. Мебурил джаллабурил тамаш хьуна бахил и чин. Загьматра дивуна уйи мебури. Сури джикIина уйи хье миллатин кунар, лекар, са чIалалди, авалдин вахттари халкьди ишламиш аркьа къабар, гварар кIвал акьуне хьес. 

Конкурсдин кьиматчибуригI гIай уйи редакциъ кар аркьаттар, хъара хье чIалан дарсар ирцIан мегIелимар. Ппара шадтти хъуттурфанди кьимат йине мебури. Ке Iайи шад хьуне шагьурариъ яшамиш вере ватанагьлибури чиппин шиниккварис чIал хум хьас адатуб. 

Гъалиб хьуттар са этапилди, кIилдибуригIас йицIуд ке иджи хуруттар гIаттивуне. Мукьар гIуьфуд идехIела, мебурикес гьаме гIуьфуд дала гъалиб хьундава. Джаллабурис мукьар йис верефттава, амма мукь хьуне- хьундава дапуна, гиранвелар дакьуна гIачучIай кканде мишттин конкурсаригI.

15-пе декабрьди редакцин идарайиъ акьуне мегIрака, гъалиб хьу ишттаракчибур къаршиламиш акьас. Чин шад э ме иштаракчибур, варха рекъуьхъра хъуттудурфуна, джалла адебал. 

БатIар насихIетарилди мегIрака дахъуне редакцин отделин редактор Алена Магомедовайи. 

  1. Садпе мукь йине Бедухъарин мактабин садпе классиъ хурай ая рушас, Исмаилова Камилайис (№9);
  2. Iудпе мукь йине  Миссиарин мактабиъ хьибудпе классиъ хурай ая кIиркIас Гусейнов Iелис (№5);
  3. Хьибудпе мукь йине  Типпигъарин мактабиъ садпе классиъхурай аярушас Кубутаева Суадайис (№15);
  4. Якьудпе мукь йине  ЧIаарин мактабиъ ерхьидпе классиъ хурай ая рушас Рамазанова Муслиматас (№11);
  5. ГIуьфудпе мукь хьуне  Избербашдин мактабиъ ерчIудпе классиъ хурай ая Гаджиева Зульфияйис (№1).

Грамотабурна савкьатар йине шиниккварис «Агъуларин хабарар» газитин редакторди Камил Мирзоева.

Ишттарак акьубан грамотабурна бицIи суман савкьатар хIезур акьуная йиркIварик кидирхIас джалла ишттаракчибурисра. Хъара ппара хIа чухсагъул пуне ме конкурсдигI ишттарак акьудегьенттарис.

Хье чIал кIвалас гьамарта. Iуьмурдин рекъуьъ хъара хIа агалкьунар хьурай хье агъуларин шиниккварихъ!

Салихат Малагусейнова 

Добавить комментарий

Ваш адрес email не будет опубликован. Обязательные поля помечены *