Халкьдин садвелдин хIаягъан ягъ акьуне МахIачкъалайиъ

МахIачкъалайиъ Русский театрдин удигь ая площадил акьуне митингра хIаягъан концерт, халкьдин садвелдин ягъас акьуна аяф.

 Ме маджлисилди адина уйи РД Правительствойин председательдин садпе заместитель Анатолий Карибов, РД Народный собранин председательдин садпе заместител Камиль Давдиев, МахIачкъалайин хIаф  Муса Мусаев, министрар, партибурин хIаттар, общественный организабурин хIаттар.

 Гьертти пуне учи фикир ая идже чIалар ме хIаягъахъас. МахIачкъалайин хIатти чIаларилди хье хье халкьдин садвел хьуна э Великий Отечественный дегIвиъ хьин гъалибвел гъушуф.

» Хье садвелдиъ э хье кьуват, ппара миллатар ая Российский Федерацин халкь читин вегIдайиъ хъай уйи, чиппин цIуьппевел агвар аркьай. Хье халкь ягъди сад э учин ватан ккахьубахъасра, мутIе хьубахъасра. ЯгIа гьинасра кканди адава Россия гуджлу хIуькуматт хьуна. Амма хьин удигьайра и, хьасра э ке батIарф идже развитира хъая хIуькумат. Ге кардис кканде гьер инсандин чIал, джаллабури чиппин загьматар са усал аркьагъилди хIуькумат бадалди»- пуне Муса Мусаева.

 РД Народный Собранин председательдин заместительди Камиль Давдиева пуне Российисра Дагъусттандисра мидегьен миллатар хъай дуламиш вей ая мукьуйис ме хIаягъ ппара лазим э. «Ме ягъ, хьевас алттушу вахттар кIвал акьас вей аягуна, хъуттурфанас» кьабахъди, зурба вел агвас хье халкьдин Великий Отечественный дегIвиъ акьуф, Iайи читинди уйчира. Хьин сад хьуна алчархьу читин кар арайил аркьай и. ЯгIа Российил ппара  читинвелар алчархьуна аягуна, хьин сад хьуна дала хьасттава хьевас гебур арайил акьас»-  пуне Дагъусттандин парламентин вице — спикерди.  Мисаъ айчIуна гъургъуне некоммерческий организацибурин Координационный советин председатель Зикрулла Ильясов хъара ОНФ регтональный Дагъусттандн  отделенин сопреседатель Мухтар Оздеаджиев. ОНФ региональный Дагъусттандин отделенин сопреседательди кIвал акьуне халкьдин садвелдин ягъ дахи хьу курарихъас хьуна аяф.

 «Ме хIаягъ аркьай э 300 ис, ме цIае хIаягI дава — ме хье зурбавелдин гIедатар ккегъдивай аяф э хьин. Ме хIаягъ э джалла миллатаринра, динаринра ме хIуькуматтиъ дуламиш вей аяттарин ми гъай ая садвел, зурбавел, игитвел, учин ватан кканвел. Хье халди сагелайна Iугелай дава агвар аркьай ватан кканхьуб, садвел. 1999 иса хьин хабакьуне игит кар, кIилна рудж аттивас адавуйи вегIдайин ахир хьас акьуна. Мубарак хьурай Дагъусттандис ме хIаягъ, иджвелар хьурай, дегIвибур дахьурай»,- пуне ги.

 Гъургъаттар кIиркIуф акьуне концерт «Вмаете мы — Россия» агъаф. Пас кканди а яме хIаягъ аркьай ая усаъ завал хьуна уйи Iу агъзур инсандегьен.