ГIурахъас хIикат

Хьуне- хьундава агъа сулна гIур. Сулахъ хъагьуная мерккуракес акьу хал, ппай гIуралахъ кутIуларикес акьуна ая хал.

Гьергелай сул келхъенди хьуна ая гIуралан хулак:

— Зе хал батIар Iэквеф э, ве хал мучIе чIерхIеф э. Адиная хьид,- сулан хал йицIуная, гIуралан хал гъузуна амилгуная аяф – аягъилди.  Са ягъарикес – са ягъа адиная сул гIуралан хулаъ учра ачат агъай ганаъ дехIера . Iэгвал хьуна ачатуная гIурала, ппай пуная сулаъ ачат сара гIурамай зун хулаъ агъай. Эхтияр йиная хулаъра ачавес. Хабди пуная сула.

— ГIурамай, гIурамай, пичил Iэкьвас эхтияр йэсева?

— Ваъ пуная гIура.

Ичинара яри Iэмал якьуная сула учис пичил Iэкьвас эхтияр йести. Уч пичил экьугъилди са- Iуь ягъалас,  адикуная сула гIур хулаас!

Iэшай, вей хьуная гIур.

Гьучархьуная мис гъурур:

«ГIанф, гIанф, гIанф! Фие гIурамай, Iэшаф?»

— «Фиштти э зун деIэшаф?  Хъауйи захъ тIуларикес акьу хал, сулахъ мерккуракес акьуф, тин хал хьид хъучадиф йицIуне, зун сул ачатуне зе хулаъ. Сула зун адикуне!

— МеIэша, гIурамай! Зун вас кумак акьасе!

Гьучушуная мебур хулагьди,  ахъихьуная гъурур:

— ГIанф, гIанф, гIанф атай! Аттаях,  сул, ях хулаас! Сула пичилас пуная :

— Агьал алдишихаба, аттишихаба, пуст адахъасе зун чве! Гъурурис гучI хьуна гьишиная.

Хаб Iэшай Iэкьуная гIур. Гьаттвей хьуная хIуч.

— Фиттихъасе гIурамай Iэшаф?

-Фиштти зун деIэшаф? Хъауйи захъ тIуларикес акьу хал, сулахъ мерккуракес акьуф хал, тин хал хьид хъучадиф йицIуне, зун ачатуне зе хулаъ. Сула зун адикуне!

— МеIэша, гIурамай,- пуне хIучала,- зун агъал ге адикасе.

— Ваъ адикас хьасттава вафас! Гъурури адикас алучIуне  хьундава, вафасра хьасттава,

— Хьасе завас!

Гьучушуная хIуч хулагьди, ав йархIуная са Iайи гучI верегъилди. Аттаях,  сул, ях хулаас! Сула пичилас пуная :

— Агьал алдишихаба, аттишихаба, пуст адахъасе зун ве! ХIучалас гучI хьуна гьишиная.

Хаб Iэшай Iэкьуная гIур. Гьаттвей хьуная са Iуьссе багниш:

— Фиттихъасе, гIурамай Iэшаф?

— Фиштти зун деIэшаф? Хъауйи захъ тIуларикес акьу хал, сулахъ мерккуракес акьу хал, тин хал хьид хъучадиф йицIуне, зун ачатуне зе хулаъ. Сула зун адикуне!

— МеIэша, гIурамай,- пуне багниша,- зун агъал ге адикасе.

—  Вафасра адикас гьасттава! Гъурурифас хьундава адикас, хIучамай ушуне адикас, хьундава. Вафасра хьастава.

— Хьасе завас!

Гьучушуная сул ая хулагьди багниш гучI верегъилди унар акьуная. Аттаях,  сул, ях хулаас! Сула пичилас пуная :

— Агьал алдишихаба, аттишихаба, пуст адахъасе зун ве! Багнишис хьуная гуч  гьишиная.

Хаб Iэшай Iэкьуная гIур. Гьаттвей хьуная ккекк дерецра алгъихьуна гIунин- кIилил.

— Фиттихъасе, гIурамай Iэшаф?

— Фиштти зун деIэшаф? Хъауйи захъ тIуларикес акьу хал, сулахъ мерккуракес акьу хал, тин хал хьид хъучадиф йицIуне, зун ачатуне зе хулаъ. Сула зун адикуне!

— Зун агьал те адикасе!

—  Вафасра адикас гьасттава! Гъурурифас хьундава адикас, хIучамай ушуне адикас, хьундава,  багнишагьасра гучI хьундава гис. Вафас хъара хьастава.

Гьучушуная ккекк сул ая хулагьди:

Уь –уь –уьуь! Зун вея лекарилди, ире чакмабура алди,  дерецра алгъихьуна гIунин –кIилил: алдучI сул пичилас!

Унихьуная сулас, гучI хьучинара пуная:

— Магьа –магьа, аликIая…

Уь –уь –уьуь! Зун веялекарилди,  ире чакмабура алди,  дерецра алгъихьуна гIунин –кIилил: алдучI сул пичилас!

Сула агъай хьуная:

Шуба аликIая…

Ккеккела хьибудпегелай пуная:

Уь –уь –уьуь! Зун вея лекарилди, ире чакмабура алди,  дерецра алгъихьуна гIунин –кIилил: алдучI сул пичилас!

ГучI хьуная сулас, алдишина пичилас – гьишиная. Ппай гIурамайна ккекк дуламиш вей экьуная ге хулаъ.

Добавить комментарий

Ваш e-mail не будет опубликован. Обязательные поля помечены *