ГIунариъ валадара итIуна, джиларис чангар атай дуламиш акьуттар

ЧIирар уга къурахиъ,
Вун че джандис булах э.
Вун адавай ме дунья,
Час хавлатин дустагъ э.

«Бабан лекарикк джаннат ккея!» — ме чIаларис мусульман халкьдин арайиъ ппара кьимат ая. Зурба келла хъая инсанди акьуная ахттилате ме. Гьерттин дадар–бабар гьер джуьрайинттар э. мебурин агубар, хасиятар, аркьа курар-лихунара сад дава. Сур аве хасиятин сакинттар, йиркIуран иджеттар. Сура хасиятин сахттеттар, йиркIуран Iаттар. Амма шиниккварин хIуьлматна кканхьун джаллабурихъди саде.
Гьер са валадин хиял ве, учин дадаласна бабалас ухьтанттар, иджеттар адава пуна. Мебурин чIире тIул–тIабиIет ул икIучира аргвайдава. ЯгIарвел фая гIелимари агъай ве инсан хIа вередегьен хаб шиникквдин саягъиди верефе пуна. Гьемиштти хьасра э.
Гьелбетта хIейиф ве хьес дадар-бабар Iуьссе вей агугуна. Фидегьен хIейифар дивучира исари учин кар аркьа. Яшар ппара хьуне агъай шиниккварис мебур чIукь кканвейдава. Валадарин улариъ гьате джигьил дадна баб суман илгванде мебур. Анджахь ме вахттуни мебурихъди шиникквдин хIуьлмат, кумак, сабур кканве.
Шиникквар ухIуна хIа акьубан рекъуьъ хIа гIезаб алве бабан гIунарил. Хъара хIа э ме гIезаб нагагь хизан хъандавай дишагьли сатти амилгучин. Зурба йиркIвар хъая дишагьлибур ая хье хIурариъра, миштти кIилар ухIуттар. ГIунариъ валадара итIуна, джиларис чангар атай дуламиш акьуттар. Зас ахъакьас ккандея гьемишттин зурба бабарикес сад иде хумбеттихъас. Агъафе мис Малагусейнова ЦIаеваз Багадаевна (БехIерин). Хуне ме Агъул райондин Тпигъарин хIуриъ БегIединра ФатIимайин хизандиъ са агъзурна ерчIувершна хьибцIурпе иса. Чаб чиппил, чиппин валадил бахилди яшамиш вея хизан, сад-Iу дакьикьайин арайиъ хIурин джалгайигIас буш хьуна гIархьуне. Буш акьуне ме вахтт алдавай ккиркIуная ФатIимайин Iуьмурди.
ЦIаеваз бабавас хабар гъушугуна, ми ахъаркьа, бабан сурат учис агуфттава, ягIафттава пуна. Дадра кIвалде агъа учис чаркквар аттиву хIуч суман, нандиъра мукь ккуьдучIай, пушмалди аруцай.
КIурар акьас дараъди вейчира, IуькIер уцас гIараъди вейчира, джуьре хIуриъди гIалашуйвелди верегунра кегьей уч дадан гIунариас кам верефттавуй агъа. Хабди файдиная дада цIае хьир. Хьуне БехIерин ЦIаевазахъ Ибригьим агъа чура, Муъминат агъа чи. Мебура бицIи ами кIине мебурин дад. Iудара учин шиникквара хъай дахе баб ушуне джуьре шувас. ЦIаеваз ухIай ахьуная учин хIабаба. «ХIабабан ттур Тамай и. Зун мис агъафи баб. Фас пичин кьандисттегьен зе хиял и хIекьдан Тамай зе бабе пуна. Гьергелай зун баб пудегьен, мин уларилас негъвар алавей.
Са ягъа хIабабан хириъ кIилра икIуна хулагъил экьуна уйи чин. Саннапуна зе гъилил негъварин тIинкIар алушуне. Я ба, фас э вун гьемишан Iешаф пуна суал йигуна, ме зас джуваб акьуне: «Джан бабан, зун ве хIабабе. Ве баб, зе руш и, ге вун бицIи ами кIифе. Гьал вун бицIиди хIа хьуная вас ягIай кканде пуне».
Алтухъ вахтт ккеттушундава, кIине мин хIабабра.
Са кьайдайин, цIеякьу исар хьуная суман руш, илгуне ме сатти. Ме вахттунира йиркIуран гIеджизвел дакьуна учин кIил ухIуне ЦIаеваз баба.
Райондин клубиъ кар аркьай, джуьре хIурариъди, Махачкала шагьурдиди концертар фай вей хIилла-чарабур аркьай хьуне. Учин кардин хIекъи гъилиди рукьу вегIдайи гьергелай са шейъ гъуланди ахьуная ме учис. Ме къабе-ттуре, ме ахун–лехIеф э ахъиланди. Ппара кIвал аркьа баба учин багунф иде Гуьлччиччай агъа са дишагьли. Ппара кумакар акьуфе агъа ми учис. Шувас верегуна ахъарта шеъ-щуьъ завал аркьай, дагIа кар ягIар аркьай, кедава Iекьул ирцIанди.

Салихат Малагусейнова

Добавить комментарий

Ваш адрес email не будет опубликован. Обязательные поля помечены *