Газитин рекъ

Авала кIедж акьас дагIа заманайи, инсанари чиппин кIваъ ая хиялар, чиппил алчархьу курар лиркIенди гъванарик, даран къаркарик. Хаб кIедж акьас ягIар хьуф, инсанари адихьас хъучучlуне газитар, китабар.

Ппара рехIетти аргвай хьес усттулил алдея газит, гъушуна хурагуна, амма фикир акьучин, Iайи четин кар э газит акьуб. Хьимудна са джура пешайин инсанар гIавей ме кардигI. Дар артIаттарилас хъучучIуна, писателярна художникарилди ккиркIуна. ЯгIа зун чвас ахъакьасе газитин рекъ дараас хъучучIуна усттулилди дегьен.

Газит аркьаф э кIеджикес. КIедж уч аркьаф э кIураникес. Гьелегуна сагелай артIай дараъ кIурар. Газитин кIедж акьас вей Iаре наратин кIураникес. АтIухаб, батIар кIур гьика материалис, амма хъархьуттар гьика специальный заводариъди. Гисаъ авей гьер джурайин станокар.

Садпу станокин азман чархаригIас гIадикуна кIур лап гIур суман музе аркьай. Ге музе гIур архъа хIа чанариъ. агIатуна хьедра, гIадаркуна аркьа яхур. Ге яхур руьхьуьна дехъес аркьай. Дехъуьф ге гьика джуре цехуниди. Ме цехуниъ яхур кIиле акьуна, джарар аркьай. Хаб ачикIуна пичариъ рукъас аркьай. Рукъухаб аттивай пичиас хIезур кIедж.

Акьуна кIеджин цIудар гьикай типографиъди. Мисаъ э кIеджикес газит вереф. Сагелай писателяри, корреспондентари лиркIенде статьябур, рассказар, хIикатар, текстар. Гьалдин вахттарис тамаша акьуна, авала четин вейи газит адихьас.

Те вахттари адихьайи станокари, хуппай гьал кIилди печатат аркьа компьютерди. Iари ликIиб хьуна газит хурас тамаша вейдава. Ишкилар ихьас лазим вей художникар. Гьер ликIи рассказихъди, хIикатихъди гебури ата гис дуьхьуь ишкил. Гидегьен кар акьунхаб э хье усттулилди газит рукьаф.

Гьелегуна хьес газит аркьагуна алдея кар рехIетти агуна ккандава. АцIуна инсанарин кар алди ая гисал. Зе тIалаб э джаллабурикес мидегьен загьматин хIекъи ягIар хьуб, гьерттин загьмат ухIуб.

Расим Гучудадов

Добавить комментарий

Ваш адрес email не будет опубликован.