Исан якьу вегIда ая: Iурд, хьид, гIул, цул. Iурд ме вахттарикес ке четин, тушкин вахт э. Уга кIур, аликIа кан, Iелеф, малдис ккерхъа IуькI алтухъди вахттуни хIезур акьуна кканве. Iусеттари агъафе Iурдин рудж ирхефе пуна. Фас пучин мебурис цIуппе Iурдар агуна ягIай авехIел.

Суварин Iурдарихъас хьин гъургъучин хьесра ягIа Агъуларин дагъдиъ мусс хьичира ппара мекIил, цIуппе Iурдар вереф.

Цулана ачику малар ибхьер дуьцIуна адикас верефттавуйи хьидин кьанайистегьен. Миштти идегуна малдис IуькIер, сумар хъара ппара кканве. ХIаттари ахъаркьай аве, авалан вахттари хIа ибхьериас е адикас давей, е керхъа IуькI хъандай кIилин убадар луькIейи чаравабурин.

Амма ттиан Iурд ибгIаф э. Е ибхь адава, е алтухъ мекI адава, е нецIул цIуппе мерккв дивуна адава. Iуьмурди ундихьу Iеламатин кар э январьдиъра кехIей малар адикай аме. Инсанарин фикирдилди ме кар аслу э гьавайин духIубавелдилас. Ахиран вахттари ппара Iайи угъай андава ибхьер. Хье хIа ибхьер бицIи-бицIи вея авалан ибгIа хIукуматарихъди.

Са багухъас инсанарис рехIет э ме ибгIа Iурдар. Сасра багулихъас, Iурдин кар ибхь, тIурфан файдиб э. Гьер вахттуни учин кар акьуна кканде.

Салихат Малагусейнова