Гъалибвелдин ягъ

Исарихъ исар вей, магьа ттиъ 75 исра хьуне хье хlададари, хlабабари ке багьа кьимат йина-чиппин lуьммурар ме дуьйил, хьасмидеттарис lекве дуья агубан бадалди. 1941 исан июньдин вазалан 22пе ягъа, хье Советский союз агъа азман хlуькуматис хабар хьуне хьеал душман алукуф.

Фашистарин Германия агъа хlуькумати маслихlет акьуна айчинра, lуьшан багамис хабарсузди алукуне багайин ягъ аркьай ая халкьдил. Душман дегlви аркьай адегуна гьерттил але фарз ве дегlвиъди айчlвас агъдарукьа халкь ухlас, хулар, мукьар сагъди амилгванас.
Гиштти акьуне те авалдин вахттуни, хlуькуматин хlаттари буюрмиш акьуна гъайшине Советский союздин хlа зурба халкь. Са хlур, са тухум, са хал хьундава дегlвин ибцlел кидиркьуф.
Сурин хулариас lари lусеттарна, хумбарна бицlи шиникквар дала амидилгуна джалла идемар ушуне душмандихъай укъас. Ппара хумбара уйи дегlвиъ аяттарис кумакар аркьай: иттаттарихъ ахъаджихlай, окопар рукlай, хъара сасра курар аркьай.
Якьу истти гаш-мекl дагъай, lурд-гlул дагъай вей хьуне хье дадарин дегlви зун кlинара душман ачатасттава, агъай.
Фидегьен гашарна мекlер хьуне, фидегьен зулумар хьуне, фидегьен тахсир кидава инсанар кlине.
1945 иса 9-пе майдин вазала дегlви ккиркlуна, душман ккедикуна хье халкьди гъалибвел гъуюна душмандил садпе ягъ хьуне. Ме ягъа Красный площадил кlилди дуьяйис аргвай акьуне Гъалибвелдин парад.
Те ягъанин хаб ацlуна хlуькуматари хье хlуькуматра гlай 9 майдиъ хlаягъ аркьа. Джалла шагьурариъ, хlурариъ парадар аркьа, игитарихъас шаирар хура, хlададарин ишкилара фацуна, хъадаваттари ттурар ликlина кlеджар фаве гъилариф.
Ме иса коронавирус агъа тегlуьн гlаттина ппара инсан айчlуна раккаригьди акьас хьасттава ме хlаягъ, амма интернетиас гьертти учин гафарар агъай, те вегlдунин ахттилатар аркьай, кебицlиттари шаирар хурай, загьмат диву, джан алихьу хlададар-хlабабарил бахилди, кlвалди ами вея ме исан хlаягъра.
Хьевас акьас вей ая кар — гъалибвел хум гьдатуна, хьехъас джанар алихьуттарин джафа гlачадатуна ме иса гъалибвелдин75 ис хьу ягъра, уч ме исра хьуна кканегъилди файшуб! Хьин дегlвибуригьас варха хьурай,те вахттарин читинвелар, гlезабар эмкlерикесра дагурай, дегlви хьегьас варха акьуттар хум гьадатуна!
Камиль Мирзоев

Добавить комментарий

Ваш адрес email не будет опубликован. Обязательные поля помечены *