Багу вея ерчIудпе май. ГьакIанди кIвал аркьая ягъ дава ме хье хIуькуматиъ. Ме хье хIададарира хIабабари зурбадалди дегIвиъ гъалибвел гъушу ягъ э.
Фишттин гIезабар, зулумвелар алайшуна гъушуная гъалибвел ичин ме хьес сайисра гьуркIун ягIай адава. Хьес ягIа дегIви агу инсанарикес ахъакьуттарикес, хуру китабарикес, телевизордиас агвар аркьа кинубриас.
Амма батIарди фачатучин мебури ахъаркьаттар, алайшуна ягъар-Iуьшар, гашар, мекIер, зулумвелар, улариъ негъв удукуна, даIешуна экьвас вейдава. Фидегьен инсанар кIеттар хьуная, гулуттар, дадар-бабар кIина ятумар хье шиникквар, сайиштти ягъниш керхьуна илгуттар. Сад-Iудра адина ахьуна адава дегIвиас сагъди джандик са ишанра кидавай.
ЙиркIуралас гьатас вере курар дава мебур.
ИдехIела гьер иса хье хIуькуматиъ ерчIудпе май адихьуная хIаягъ э пуна. Ме иса ме дегIви ккиркIугунахъас хаб алттархьуная ярцIурна ерхьи ис.
Ме хIаягъахъди ппара хIезурвелар аркьа хье халкьди.
КIилил гъузуна хIаттари ягъар ккими завал аркьа хIекимар, ахтармиш аркьа мебурин хIезурвел хIаягъахъди, хъара буйирмиш аркьа чиппис иджи аргва, акьуна ккане курар.
Ме хIаягъ бадалди хье хIуькуматиъ аркьа гьер джурейин акцибур: «Сад памяти», «Вахта Памяти», «Диктант Победы» хъара «Георгиевская ленточка».
Ппара ме ягъахъди хIезурвелар аркьа мактабариъра.
Дарсариди унархъа дегIвиас аде ветеранарис, ера гебурин валадарис. ТIалаб аркьа гебурикес ахъакьас дегIвин вахттарихъас, шиниккварира тIегIем аркьагъилди, фидегьен четинди фачархьуная гъалибвел ичин хьес ме.
Исар алттведегьен ветеранарин санра чIукь вея. ДегIвин вахттари джандик керхьу йирхIунари, хабди джандивасра хьуная гебур.
ЯгIайин ягъас акьу хIисабарилди хье Дагъусттандиъ амеф ягъцIурна муя ветеран э. ИдехIела хье Дагъусттандин хIаттин Сергей Меликован ппара тIалаб ая батIарди йиркIв фай хъучаверегъилди ме хIаягъ акьубахъ, гьер са ветеранихъди вахттуниай ахъарукьас аркьагъилли чиппис хIезур акьуна савкьатара.
Хье хIададарира хIабабари чиппин джандилас гъил гъушуная, хьес идже Iуьмур йис пуна. Гебур йиркIуралас гьадатуб —
хье йина ккидиркIва кьимат э.
Батитай Габибулаева
