Фиштти хьичин Хьидин Iуьш

Накь рекъуьл акьуне Хьидин Iуьш. Райондин хIатти акьуне батIар хIаягъ. Джигьилари агвар акьуне чиппин гуджарна гьунарар: фуш дахи гьуккайчуга акьуне, тупп дурхIуне, тIил дивуне, гиря гъадивуне, гъван ахъатуне.

Школа искусствди кар аркьаттарира мактабикк ккея шиникквари акьуне мегIнибурна лехъунар. ГIаттивуне ке иджи гьина акьунчин.

Ппара шадвелар акьас атундава дуьюйин гьавайи: багамикестти уйи мекI, гIуьбехъми хъучадине ибхь. Ругъай мекIила уйи инсанар. Саса бицIи шиникквар уйи суратаригъ шаIар гIатIишина. БатIарди Iуьшра хъучадайина ккиркIуне ме хIаягъ.

Зас пас кканди аяф фи э? Исалас исалди иджи кканди андава инсанарис Хьидин Iуьш. Авала зас кьвалди э фиштти хlезур вереф ичин гихъди. Бицlи шиникквар ккидаркафи бурчlанарикк завал аркьай уга шейэр ищигерилас хъучучlуна цlуре калушарилди ккиркlуна. Хlа шиникквари хъадиркlенфи фурар, гъарефи кlурар.

Бехlс фаверефи нае мехlелайин цlа хlаф хьас ичин, нае цlабурихъ ппара инсанар адес ичин. Зас кlвалди э са Хьидин Iуьшуй зе къунши адафайдина раккагьди телевизорна видеомагнитофон мегlнибур ахъихьуне инсанарис тамаша хьуна че цlабурихъ ппара гагьди илгурай пуна. Джалла хулариъ аркьафи Куче Муссу. Гьал нагагьра аркьай андава. Райондин хlатти хlаягъ акьасттегьен гъурзанф давуйи авала. Гьал инсанарил эхlтибар акьучин баджат сайира акьасе хlаягъ.

Гьер хlурин учин ягъ аяфе Хьидин Iуьш аркьаф. Хьибу хIуриъ: Тпигъ, Гъудгъул, Мисси, —  аркьа цIабур цIе ерхьид пе мартиъ, сасрабири сасра ягъари. Ппара гIурариъ акьас кканве субботайиъ.

ЯгIайилас тич хье гIедатарилди  хъучучIа хьид. ХIа инсанари агъафе: «Фиштти хьичин Хьидин Iуьшан кьабахъ хъая сад пе ягъ, гьетиштти хьасе джалла хьид, фиштти хьичин Iуд пе ягъ – тишттинф хьасе гlул, хьибуд пе ягъ хьегъилди хьасе Iурд». Хьин умуд кихьасе ме ис идже хьасе пун. Чух сагъул ме хIаягъ акьуттарис.

К.Мирзабрин

Добавить комментарий

Ваш e-mail не будет опубликован. Обязательные поля помечены *