Фиштти аркьайчин вакцинация Дагъусттандин районари

Майдин ваз хъучадигъилди 4,8 млн инсанар иттар хьуная хье хIуькуматиъ коронавирус агъа итталилди, магьме ягъарин арайиъ иттаяттар хъара ппара хьуная 8,6 агъзурдегьен, кIиная 342 инсан. Ке хIа процент инфекцин аяф Алтайдин хъара Магаданский областиъ, Дагъусттан 13 пе мукьуйил ая COVID инсанарис хьубаас.
Хье хIуькуматин хIатти фачийине вахадну ягъар майдин хIаягъарин арайиъ 4 петтилас 7 пе майдисттегьен вахтт ами цIае вея коронавирусный инфекциъ, джемеIетис дахьурай пуна.
Ме ке герек иде матлаб э фачийиная указин пуне брифингдил вице-премьерди Татьяна Голиковайи.
COVID гъузанас хIеракат аркьая хIуькуматин хIаттари джемеIетис вакцинацин рубар атай. 2-пе майдис 8.51% са джуре руб йирхIуная, 5.23% кIилди ишламиш акьуная.
Амма Дагъусттан ке ахиран мукьуйил э аяф. Ке удигь гьаяттар вакцинация акьуттарикес э Бежтинский участок, Курахский, Рутульский, Хунзахский, Докузпаринский районар. 52 муниципалитетарикес ишламиш акьуная Дагъусттандиъ 17, гIешкъ аметтарис вакцинация акьас адесе цIае поставка. Районарин арайиъ вакцина кIилди ишламиш акьуная Курахский, Хасавюртовский, Хунзахский, Гумбетовский, Сергокалинский, Хивский хъара сасра районарира.
Дагъусттандиъ кIилди 1732 инсандис акьуна ккандея вакцинация. Аме 400 верш вакцина гьикунаяттар ишламиш акьуная районариъ 23%. Сасрабур вакцинация акьуна кканди аяттар э Агульский хъара Кулинский районар.
Iудпе процентин мукьуйил вакцинация акьуна аяттар Курахский, Рутульский, Хунзахский хъара Докузпаринский районар. Бежтинский участокдиъ ишламиш акьуная 100% вакцина, гебур э администрациъ кар аркьаяттар 71,1%.
Хье хIуькуматиъ ая инсанарин джандиъ кьуват хьас вакцинация акьуна кканде 60% яш хьуна инсанарис, цIае ис хъучучIугъилди ахъаркьай уйи Михаил Мурашкойи.
Хьибудпе волна дахьас маскабур аликIуна аруцай кканде. Амма сайтариъ ая фиштти курарил алдея инсанари мероприятибур аркьагъилди маскабур алдавай.

Жавгарат Хамазаева