Фиштти аликIунайчин

Са ягъа хьира къавахIан акьуная маллайис гин касибвеларихъас.

— Ве пеша маллайинф ичин, вун ве кардигьас кьимат гъушуна кканде, — пуная хьира.

— Гьелиштти акьасра э зун, — пуная маллайи хьирас.

Аттушуна раккагьди ккиригиная Аллагьдис. Ге вахттуни къунши ахьуная хулагъил учин девлетарил бахилди сан аркьай. Уч Iайи гашинф хьуная ме. Маллайик келхъенди фатуная ми къизилдин верш манат. «Баркаллагь», — пуна, гъушуна манатра, ачушуная малла хулади. Са-Iу ягъарилас аргва ме пул алайхьуттис маллайин хизанари  ягъалас ягъа батIар шейъ-шуй гъуланди.

Ушуна ая къунши маллайилди учин пул хаб тин пас.

— Зун, — пуная мис маллайи, — Iаре Аллагьди пеф акьунаяф, зас пул еф Аллагьди э.

— Давайчин шаб,- пуная гашин идеми, — кьазилди (судья) вес.

— Шаб, — пуная маллайи.

Рекъди веягуна пуная маллайи:

— Заал чIирхIе кунар алдеяф зас кьази вахъди хьас гучIа.

— Ма зе цIае чухай, — пуная гашинтти.

— Вун хIейвандил, зун хьилаба вея, кьази вахъди хьасе, — пуная маллайи.

— Ма давайчин вун алекьв, — пуная гашинтти.

Кьазилди ачадина гашинтти ахъакьуная фиштти учи пул завариас адайхьучин.

— Вафас фи пас хьасе ве дузвелдихъас? — хабар гъушуная кьази маллайифас.

— Гьеме инсан, — пуная маллайи, — гьамиша зе шейэр учинттар агьай бала ве заал. Гьеме чухайра учинф э пасе ми агьал.

— Дагьич ду?

— Зун алекьуна мич аде хIейванра веф э пас эхи вун.

— Зе хIейвандил алекьуна э вун мич адеф.

— Зун чве гъавурди архьуне, — пуная кьази, — чве суал ккиркIуне.

Добавить комментарий

Ваш e-mail не будет опубликован. Обязательные поля помечены *