ЦIае ис хъучадидегьен хье хIуькуматиъ гьер джурейин духIубабур ве. Ке Iайи инсанарис гъам ве пулун кьимат адархьуна Iеле-ухаттарин кьиматар гъайшигуна. Магьа гьеме исара инсанари ке ппара Iеле суман задарин кьиматар вартт хьуная: гIурин, симичкайин ччамун, гъурагъаларин, пусукIин. Хъара мебурихъай вартт хьуная сасра задара, амма мебурин кьиматар Iайи аларгуне инсанарис, фас пичин гьер ягъа ямаг суман ишламиш аркьаттар идехIела.
Ме кардихъас хье хIуькуматин Правительство алучIуная ме кьиматар гъурзар акьас. Михаил Мишустинан постановленилди пусукIинра ччамун кьиматар акьуная, са килав пусукIигьас ппара хъай гъуршанттарис хьибцIурна ерхьи манатигьас, сасатти гъуршанттарис ягъцIурна ерхьи манатигьас, са литIри ччамугьас ерцIурна гIуьфу манатилас вершна йицIу манатигьас ирцIангъилди.
Ме кар бадалди хье вилаятин Минсельхоздира Минпромторгди акьуне маслихIет гьеме задар ке цIайи адихьаттарихъайра, гьемебур гьер усариди ахъарукьас аркьаттарихъайра, масса ирцIан хIа дуьканарихъайра. Амма ая аришваришчибур чипис петтар даркьаттара, сур ая къацIра фера дапучира чаб димари рази вереттара.
Дагъусттандиъ ая аришвариш аркьа «Зеленое яблоко» агъа хIа дуьканар чаб димари рази хьуна мишттин кьиматар акьас, чиппихъай маслихIетра дакьучира. Мебурин чIаларилди, шейъэр фартаттарин хаб чукIуб адава кьиматар гъадивубас, амма пусукIна ччам масса йиб вей-вей чукь вея.
Ке цIайи пусукIинра ччамун кьимат гъайшас алучIуне алттушу иса декабрьди. Тегунахъас хабра мебурин кьимат гъайшине ме алттушу вазала ерхьи-ери манатилди дегьен са килавигьас. Аришваришчибури агъа алттушу вазала са литIри ччам масса йис вейи вершна къа манатигьас, ме вазала ме кьиматигьас чин чиппи гъуланди ая аркьа мукьуйиас.
ПусукI багьа хьугуна гихъай сасра итте задара багьа аркьа. «Че фикирарилди, якьу вазалан удигьай хьунафе пусукIин кьимат вартт. Гьал инсанари алтухъ итте задар Iелди андава. Гъуланчира ке ппара хъатвереф пирогарна медовик агъа тортар э. Сайишттин тортарна десертар багьа э. Чавас гъушанас ве пусукI ягъцIурна якьу манатигьас са килав, правительствойи петтилас е ахттра дава, е варттра дава», — пуне кондитерари.
Июньдин вазаласттегьен къадагъа акьасе пусукIин кьимат, инсанарис хабар хьасе ахтт хьуф джуре са вахттунис хаб вартт дахьуч иджи э.
ГIур багьа хьугуна, гIурикес аркьа сае задаринра кьимат вартт ве.
Ччамун кьиматра октябрьдистегьен гъузанасе, амма хьасегьан пуна хъаттдаратIай гъас аришваришчибуривас маслихIетигI гIачархьу джурейин ччамар сайисра ягIайдава.
Хье Дагъусттандис мебур багьайи аттархьа, хьин сасра вилаятариас гъарехIела. Хьехъ е пусукIар аркьа усар, е ччамар аркьа усар хъудава, идехIела э хьес кьиматра вартт вереф.
Ппара тIалаб э Дагъусттанарин хIекимарис ме кардихъас фикир акьуб. Дагъусттандиъ мебур аркьа мукьар дахъучин, ме задарин кьиматра ахтт хьасе инсанарис курар хьасе.
Батитай Габибулаева
