Фи агъайчин яш хьуттари коронавирус дахьас ата рубарихъас

Агъуларин райондиъ коронавирус агъа иттал дахьас рубар йирхIуная 30% вартт яш хьуная инсанари. Агъулаъ ме вакцинация акьуная вершарилас вартт мисаъ дуламиш вере
хизанари. Ягъалас ягъа ппара вея гIешкъуниастти вакцина акьас кканеттар. Инсанди тегIди фикир акьудегьен учихъас, учин багу кIилинттарихъас, вахттуни ккеттархьасе уларис даргва душман суман итталиккес. Гехъуьнарин хIур кьадар сан акьухаба ке удигь гьая COVID-19 дахьас эхIттият акьуная инсанарин.

Вершна алтухъарикес, са пай яхьцIуралас вартт яш хьуна аяттари э рубар йирхIуна аяф. Ме вакцина акьас ахттигьар ая 18 ис хьуна аяттарис. Духттурари вакцина акьастти кIилди иттаф, диттаф ахтармиш акьай аве руб йирхIас кканеттарин, хъара гIайчуга аркьа иммуноглобулинар М, G. Прививка акьас хьибу ягъ ами ахттигьар адава дивас, ухас хъара прививка
акьуванхабра гидегьен гагьди.

Агъул райондиъ ая иттаттай тIушас, руцас давереттарилди вере духттурарин бригада. 82 ис хьуная Рамазанов Базукай Махмудовича хъара гин хизанди Айшайи гучIа агъа чиппис
ме чIирхIе иттал кедишас чиппикди. «Че яш хьуная, вахтт ами са хатIа кедиркьвас иммунитет вартт акьуна кканде COVID-19 агъа вакцинайин руб йирхIуна. Миштти идегуна, зас гучIа температура гъайшас, чIирхIе хьас зе джандис, амма кьацIра хабар хьундава, фиттиъра Iуьр акьундава ме руб йирхIуна. Зун
хIисаб акьа вахтт ами эхIттият акьуна кканде джаллабури.
ХIуькуматира, духттурари джемеIетин сагъвелдихъас фикир акьуна э хьес ме рубар йирхI агъаф. Зас чугъсагъул пас ккандея духттурарис, яш хьуная инсанарихъас фикир акьуна
ахъаджихIаттарис», — пуне Гехъуьнарин хIуриъ дуламиш вере инсанди Рамазанов Базукай Махмудовича.

«Агъуларин райондиъ ая духттурар хIезурди ая мункинвел фачиянас гьерттис коронавирус дахьас руб йирхIас. Вакцина джаллабурис гьуркIадегьен ая. Такзил акьас джемеIетин
иммунитет прививка акьуна ккандея 60% инсанарис. Гьалдис прививка акьуная 37% Агъул райондин хIурариъ ая яш хьуная инсанари»,- хабар акьуне Гехъуьнарин хIурин ФАПдин хIатти Тамила Меджидовайи.

Гехъуьнарин хIурин дишагьли Хадижай Аюбовайи пуне, учин сагъвелдихъас гучIай кьастт акьуф прививка акьас. Iудар рубар акьуна, гьава иджи ая гин.

«Аюбоварин хизанар ке удигьай димари акьуна аяфе вакцинация», — пуне Тамила Меджидовайи.

«Зас сад ягIа, нагагь духттурари хъара хIуькумати акье агъа насихIет фачиянхаба, зе кIилиъ фикира кегьей хьасттавуйи дакьуна экьвас ме прививка. Айчин лазимвел ая, гьегебурира хьехъас, хьес иджвел хьурай пуна э агъаф. Зас ягIа, фиштти вейчин багунттар кIигуна, ме иттали ппараттарин Iуьмурар файшуная ме дуьйилас. Идегуна, гьемишттин мункинвел ая вахттуни акьуна кканде хъагъишас хьас вахъасра ве багунттарихъасра, зе 84 ис хьуная прививка акьуф зун муратти ая», — элхъенди пуне Хадижай Аюбовайи.

Участковый медсестрабур гьер ягъа аларуцас ве коронавирусдин рубар йирхIуттарилди, хабар гъуянде, сагъвел фиштти ая пуна. Фи агъайчин яш хьуттари коронавирус дахьас ата рубарихъас

Жавгарат Хамазаева

Добавить комментарий

Ваш адрес email не будет опубликован. Обязательные поля помечены *