ЯгIа, 19 пе апрельдиъ, Дулдугъарин КДЦйиъ хьуне хIурарин маджлис. ХIуринттарихъай гъургъас адина уйи гIалашувар райондин хIаф Ю.Г.Исмаилов кIилил алди. Райондин хIаттис хIурарин маджлисари ушуб гIедат хьуная.

Ме иса Дулдугъ Iудпеф э Буршагъарин кьабахъай. Ме маджлисил гъадивуна уйи хIуриъ ая читинвелар, суалар, хъара фи акьунчин хIурин хIатти.

Сифта Дулдугъарин хIаф Казбек Фейзуллаева  ахъакьуне учи акьу курарихъас.

«Админситраци дуз акьуна гIарариди вере рекъер, сур мукьариъ цIае рекьер акьуне, чIирхIе рекъер гIарариди андава. ХIурин гIана ая  рекъериъ ая уркIариъ ахъуная ругар, дуз акьуна ая трансформатор, чIукь-муз дуз акьуная ферма»,- пуне К.Фейзуллаева.

Хъара хIурин хIатти ахъакьуне хьед дивубахъас 500 митIрибирилас вартт, чIирхIар файшуб арайил акьуна ая, кIе малар архъа къуй дуз акьуне, духIуба акьуне администрацин идарайин гъвад. Хъара аркьа субботникар, гьаттивуне хIурин арайи ая бурчIан.

«Участковыйра хъай къайда акьуна кканде маларин къайгъубур. Читинвелар хъара аме, чин хIезурди ая гебура кIили гъас», -пуна ккиркIуне гъургъуб Дулдугъарин хIатти.

ХIуринттари ахъакьуне ая читинвеларихъас: хьеттар дивуб цIае хулариди, цIае мазгит акьуб, спортзал акьас башламиш акьуб, некьварихъди вея рекъ ккийиб, са къадагъа адавай малар фатуб. Гъудгъуларин малари аккерта хуппурар, джиларин кIеджар дуз акьуб, цIае трансформатор алийиб, Iеквун гуж гьудуркIайдава.

«Зун ппара шад э дулдугъарихъай гьучархьас. 10 исанди удигьай чве хIуринттарин хъара хIа суалар уйи агьалдилас, чин гебур джалла кIили файдине. Ме КДЦ хьин агьал аяф, кIенаас кIилиди цIае акьуна ая. Мактаб батIар акьуне директор Амир Фейзуллаевра хъай. Ме директор агьал джалла мактабарин директораригIас идже къаттиъ ая. Хъара хIуриди вере мугI кьуне, гъадивуне детский сад», — пуне Ю. Исмаилова.

Хъара райондин хIатти кIвал акьуне ФАП гъадивуб, сотовый сигнал верегъилди акьуне. Ю.Исмаилова пуне, газ дивуб тIушуна ая са мукьуйилас: хьехъ проект хъая.

Райондиъ ачагъаре маларихъасра мугъатти хьуна кканде пуне райондин хIатти, гебурик итталар кихьуб мунким э.

«Зас чвас пас кканди ая са площадка аркьагъилди шиниккварис. Мазгит акьубанра зун ке удигъай кумак акьасе, цIае акьас кканди ая спортзал гъурзар акьунара. Джигьиларис пас кканди ая малар ухI пуна, хIурин ферма Iари идилгвангъилди, чафас вере кумак чинра акьасе. Хье джемеIетис хъара ппара иджвелар рукьая», — пуне Ю.Исмаилова.

К.Мирзоев