Магьа хьибудпе ис э коронавирус хьес ягIархьуна. Иттаттарин сан гагь чIукь, ве гагь ппара ве, амма ме гIуьзурдис хьегIас гIайчIвас кIваъ адава. Хаб алиланде цIае тамбигьар, къадагъабур. Фас пучин, иттал хаб къате вея. Амма ая курар, итталарихъ, тамбигьарихъ хъуттурфуна хаб акьас давереттар.

Ме курарин пешакурар са фиттихъра хъуттудурфуна чиппин курарилди айчIуна кканве.Мебур больницайин пешукарар, аптекабуриъ кар аркьаттар, натиджабур масса ирцIан дуканчибур э. 

ДжемеIетин гьава фиштти ичин ахъакьуне райпойин дукандил кар аркьай ая Курбанова Эсмира Алиевнайи. 

— Зе фикирдилди, дукан ке ппара инсанар завал вере мукь э. Хьасра гьер яшанинттар. Нагагь кедишас кканехаб, багьанара ппара э. Зе хулаъ музе шиникквара ая, хIа яш хьуттара ая. ДехIела зун вахтт ами йирхIуне руб. Мисаъра атунаве зун алтухъан маскабур, гъиларис йирхIас антисептикар. Миштти ичира, маска алдай зун дуканди фушра ачартас алучIайдава. Ме хьибу исан арайиъ зас дукандиъ дагу джуьрайин инсанар адава. Сурис ппара ул гьаве ме итталигьас, сурис кьацIра бала гIавейдава, сур хъудугъаттара аве. Маскабура сури аликIа, сури аликIайдава. АликI пугунара хъелар алгъавереттар аве. Амма штрафарихъас унихьухаб чара айра, адавайра сеIети хьунара аликIа. 

Хьин джаллабури джувабдарвел фай, эхIттият дакьучин, хьефас ме иттал хье арайиас адикас хьасттава. Див хьин чIал сад акьуна коронавирусдис ваъ пас!

Салихат Малагусейнова