ДегIви киркIуне гьер хулас

БатIарди фикир акьучин, хIекьдан Ватанин хIа дегIвин зарар гьер са инсандис киркьуне. Илгундава са хизанра, хулаас са инсан дехIера ме дегIвиди дафайшуф. Амма ягIа хьин, гьалдин несилар, хье игит хIададарин Iуьмурдихъас фичира ягIар акьас алучIугуна, хье дадар-бабарифас вейдава хьес алтухъ кумак акьас. Фас пучин, мебурис чипписра лидегьен фера ягIай авейдава.

Хъара читин ве, нагагь ме инсан дегIвиас дарукьуф сара идехаб. Мишттин аскерарин санра лап ппара э. Гьаме кардихъас э тиъ Гъалибвелдин ХIаягъ багу вередегьен, ягъ ягъалас алтухъ ве ватанпересвелдин мегIракабур.

Ме мегIракабурин мегIна э хье хьасмиде несиларис ме игитарин гьунарвел ягIар акьуб. Гьемиштти засра ппара читин э зе хIададахъасра фичира джикIенас. Фас пучин, зе хIадад дегIвиди верегуна, зе дад хьибу ягъан шиниккв и. Ададанра гIуьфу ис дала давуйи. Гьелбетта мебурис чиппин дадан хъуьсура кехIей кIвалди андава. Е дегIвин вакъиабур агуттара, ягIаттара андава.

Зун алучIасе зафас завал акьас хьу ягIарвелар чвехъдира рукьас акьас. Ппара файшуне ме дегIвиди хье халкьра. Джаллабурин джалгайигI гIай файшуне зе хIадад Абдуллаев Шафи Абдуллаевичра, учин бицIи чу Iелира хъай. Хуне ме са агъзурна ерчIу вершна садпе иса Къуругь райондин Херадж агъа хIуриъ ГIебдулагьанра ХIуьрин хизандиъ. Шиниккв вахттара лидегьен рехIетти ушундава мин. Фас пучин, вахттар читинттар и. Са кьацI гуни IуьтIуб бадалди кIесттегьен загьмат дивуна кканвейи.

Хизан акьуне ме хубджи кьанайи. Шафинра Салиматан хизандиъ хьибу шиниккв хьуне, Iу кIиркIна са руш. Руш ерхьи ваз хьуна кIине. Са агъзурна ерчIу вершна ягъцIурна Iудпе иса бицIи кIиркIан хьибу ягъ дала давай файшуне зе хIадад дегIвиди. Са агъзурна ерчIу вершна ягъцIурна хьибудпе исан декабрьдин вазала адине извещение, Абдуллаев Шафи ун-хьил андавай гулуне пуна. Са гагьра ккеттушундава, бицIи чу Iелира кIине пуна хабар адине дадар-бабарис.

Хабди са Iу вазарилас файшуне дегIвиди мебурин хьибудпе чу ГъазимехIемадра. Хулахъ хьедра хъударкуна, Iар акьуне даданра бабан йиркIвар. Бахттунис дегIви ккиркIухаб ГъазимехIемад-адад сагъ-саламатилди адине учин ватанилди. Дадар-бабарин, багу-кIиларин шадвелдин кьадарна кьенегIет адавуйи. Амма че хIабабан гьер са ахттилатин кIил и хIададан ттур. Ха дуьгIебур и гин дунья ислехI хьурай, чвас дегIвибур дагурай!

Зас чугъсагъул пас кканде хье хIададарис, хьес Гъалибвел къазалмиш акьуттарис! Фидегьен мебурин суратар хьес дагIайчира, мебурин игитвелар хьес мусра хум хьасттава.

Салихат Малагусейнова