Iу исалас вартт дегьен гагь хьуная инсанарис ягIархьуна цIае иттал- коронавирус. Сифтта ме иттал бадил хье вахттуни хабарар ппара хьуне. Уйи хъудугъаттара, бала гIадаваттара, фера хьасттава агъаттара. Сифтта ме итталин гьава гьалдис ая гриппинф суман и. Амма вахттуни хъучудушу арайи инсандин гьава лап Iайи чIирвейи, кIеттара гьеф, инсанар гъавурдиъ архьуне, ме итталис зарафатар дагIаф.

Хубджи вахт хьуне духттурари ме руб, те руб, гьер дарманар аркьай иттаттарис. Сагъилдира инсанар арайил алчихьас вей давуйи. Са вахттуни, иттаттарин сан ппара хье арайи, больниццабуриъ мукьар андавай, хIуькуматин хIатти алийина къадагъабур, атуне инсанар хулариъ. Те вахттуни самуз чIукь хьуне иттаттар. Хаб инсанар фату арайи башламиш акьуне инсанарин алчушуб — алттушуб, цIакIинар, гамачIар.

Хабди адихьуне инсанарис кумакис вакцина. Мин уйи Iу-хьибу джуре. Вакцина акьас хъучучIу арайи, иттаттарин сан чIукь хьуне. Амма гьалра ппара аме дакьуттар. Дакьуттарин гьерттин са багьана ая. Ая гучIай даркьаттар, ая акьас кканди джандин гьавайивас гъадивас давереттар.

Сад гьемебурикес Магомедов Курбан Ахмедович э, 1950 иса хеф. Дуьйин гьава аргвай, мисра кканди ая вакцина акьас. Амма мин сагъвелдихъ хъуттурфуна акьас ахттигьар адава. Фас пичин, мин джандик хунухиас димари ягъниш кеяф э. Учил рукьучин, ягIа димари рази ая ме. Мис аргвая,  хIа ешанин инсанар Iайи иттарвей, хъара хулаъ хизанара ая. Мебурисра, учисра иджвелихъас рази э вакцина акьас.

Луиза Гусукаева