18 январьдиъ Дагъусттандин хIаф Сергей Меликов Москвайиъ иштараквел акьуне Правительствойиъ вея заседанигI Координационный советин. Мисал гъадивуна уйи суал и коронавирус итталихъас.
КIилиъ файшуне ме заседание хье хIуькуматин премьер-министрди Михаил Мишустина.
Мишустинан чIаларилди, ме цIае хаб хьехъди гIаттина «омикрон» агъа иттали ппара дахи фарцанди ая кIилди дунья. Ме кардихъас хье Правительствойиъ кьабул акьуная план фи джуре курар акьуна кканди айчин, хъара иджи хIезур аркьагъилди больницабур, нагагь иттаттарин сан вартт хьичира.
Координационый советин заседаниъ уйи джалла министирар, хъара субъектарин хIаттара. Михаил Мишустина мебурикес тIалаб акьуне мугъатилди экьубал ме «омикрон» агъа итталигь.
«Зе фикирарилди, гьалдис больницабуриъ ая иттаттарин сан вартт хьуна адава иттал гъайшина айчира, ичира са инсандисра ягIай адава, фиштти ми уч агвар акьасичин. ИдехIела хьин джалла хIезурди ай кканде», — пуне Мишустина.
Гьер регионариъ муфеIет кей кар акьуна кканде больницабури, скорый помощьдин службабури, горячий линибури, ме кардихъди хъучадивуна кканде студентар, волонтёрар хIа инсанарис кумак аркьагъилди.
«ЯгIайин ягъа джалла регионарин хIаттар ай кканде чиппин мукьариъ, халкьдин багулив, гебурин суаларис джувабара ирцIанди, кьабул аркьай ме итталигьас къайдабура. Миштти идехIела Правительствойиъ маслихIет акьуная Российский инвестиционный форум хабдивагъилди- февральдиъ дакьуна, чукь кьанайихъди. Михъди хьин хъучадесе самуз хье дуньяйин гьава идже хьегуна ме итталикес», — пуне Мишустина ме заседанил.
Джалла акьун ккане курарикес, ке герек кар хIаттари акьуна ккандеф Мишустинан фикирарилди э: ме коронавирус итталис къайдабур акьуб, дарманар хъучатуб, иттаттарихъ вахттуни хъучушуб.
Ме кардихъас хье хIуькуматин хIатти Владимир Путина буюрмиш акьуна ая джалла регионарис хъучартагъилди 5 миллиард манат дарманарис. Мебур кидавай, кумак акьасе ОМС системайисра.
Ахирахъди Михаил Мишустина тIалаб акьуне мисал завал хьеттарикес, вахттуни вакцинацира ревакцинация акьубахъас, инсанарис иттали зарар дайиб бадала.
Хъара Правительствойин Председательди гъадивуне курарил але инсанар хулариъ акьубахъасра, эгера аркьа кардис мушат даверехаб.
Мисал кьабул акьу маслихIетар ахъарукьасе хIуькуматин хIаттихъдира.
Батитай Габибулаева
