Дагъусттандиъ коронавирусдин иттал гъайшихаб мич, иттархьуная йицIу агъзуралас вартт шиникквар. Авалла иттархье шинникквар алтухъди больницабуриъ артайдавуйи, ягIайин ягъас итта шиникквар ковид-больницабуриъ ппара хьуная. Сифтта коронавирус аттархье вахттуни, шиникквар алтухъ иттар вейдавуйи. Гьал бицIиттарин арайиъ иттархьеттар ппара ая. Ягъалас ягъа вартт дала вей адава иттал.
Итталин гьавара, аркьа руб-дарманра, читинвелра джуре вея. Амма, духттурарин чIаларилди, шиниккварикес Iудтти ппара хIаттарилас кедиша иттал. ЯгIайин ягъас COVID-19 хьуная 8,7 агъзур шиникквдис. Ппара иттарве махьтабариъ ая шиникквар, ери исалас цIеери ис хьеттарихъди рукьуна, ме 67% э. 33% иттаттарин хIисаб акьуная ерхьи ис хьеттарихъди рукьуна. Агьалдис атIу сагъ аркьа дарманар е бицIиттарис адава, е хIа инсанарис.
Ке иджеф шиниккварис хIисаб аркьа алтухъди адаруцуб, фун ацIасттегьен гъархьеб, вахттуни сагъвелдис муфиIет кей IуьтIуб, гьер джурайин витаминар гIачихьуб. Руб-дарман акьас алучIа гьерттин гьавайихъ хъуттурфуна. Амма, 20 коронавирус хье шиниккв, фидехьен духттурари руб-дарман акьучира, сагъ акьас хьундава, гьемебурикес са пай Iу исра кехIей дахьеттар и.
ЯгIайин ягъас Дагъусттандин ковид-больницабуриъ сагъ аркьай ая 32 ковид хье шиникквар. Хъара ппара ая иттаттар хулариъ экьуна сагъ аркьаттар.
Ноябрьдин ахирарис 2021 иса Минздравди РФ адихьуне шиниккварин вакцина «Спутник М».
Гамалеийин ттур але НИЦЭМдин хIаттин Александр Гинцбургдин чIаларилди, 2022 иса башламиш акьасе прививкабур акьуб шиниккварис.
Гинцбургдин чIаларилди, хабди хьасе хъвехъуьраъ агъича дарманра. 2022 исан ахирарис дадар-бабарин разивел фай хьасе йирхIас коронавирусдин вакцина.
Грипп, ОРВИ суман кедиша инсандикес инсандикди COVID-19-ра. ДехIела э инсанарис маскабур аликI агъаф.
Алтухъ гереквел адавай ппара инсанар гьер усариди мева пуна ая: дуьканариди, цIакIинаригIди, джуре маджлисариди.
Духттурарин чIаларилди, шиникквара, хIаттара хулариъ ая вахттуни ме хIа ягъари, иттаттарин хIисаб чIукь хьуне.
Луиза Гусукаева
