5-пе майди Дагъусттандин хIатти Сергей Меликова файшуне совещание хъучавея ГIалибвелдин хIаягъас хIезур аркьая мегIракабурихъас. ХIа пай мегIракабур хьасе Махачкалайиъна Каспийскдиъ.

Гьер иса суман, тиъра алиянасе тукар памятникдил Воин-освободительдис Махачкалайиъ ая некьваригI, акьасе военный парад Каспийскдиъ, хулариди рукьуна весе дегIвин ветеранарилди, хъара хьасе хIуькуматин акция «Бессмертный полк».

Вилаятин вице-премьер Муслим Телякавова ахъакьуне, «Бессмертный полк» весе джалла шагьурариъра районариъ, мисагI гIачархьасе ади кIил 300 агъзур инсан. Iари Махачкалайиъ аркьа акцигI гIахьасе 200 волонтер, мебур ягIа хIезур аркьая ме кардихъди. Акция башламиш акьасе шагьурдин площадильдилас 15:00 вахттуни, Расул Гамзатован проспекдиас аттвесе Сулейман Стальскийдин куьчайиди. Инсанар ппара завал верехIела, са пай джемеIет весе М.Ярагскийдин куьчайиди, мисаъ Iуьрусарин театрдин удигь акьасе концертар. Мишттин концертар акьасе Авар театрдин удигьра, хъара Дагфилармонин площадьдилра.

Ме ягъа хьасе ацIуна гьер джурейин мегIракабур. Каспийдин флотилин командующийдин заместительди ахъакьуне чиппин хIезурвелдихъас Каспийскдиъ аркьая парадихъди. Ахиран хIезурвелар хьасе 7-пе майди. МисагI ахьасе 12 расчет, хъара 23 гьер джурейин машинар. Сакинвелдин суалар ке удигь гьая ягIди.

МВДйиъ хIезур акьуная са фулан кьадар инсанарин ягIди аларуцай алгъузунаттарин. Хъара хIа фикир ирцIанди ая Каспийскдиъ парадихъ акьуна ккане сакинвелдис. Сергей Меликова арайил акьуне гьер идарабурис ирцIан буюрмишар. Хъара хIа фикир йина кканде Украинайиъ аркьа спецоперациъ кIинаттарис. ХIаттин чIаларилди, ме ягIа садра хум гьатуна ккандава. Гьерттин хулади ушуна ахтармиш акьуна кканде.