Даги Iекул кея мал э

Хулан дагибур садпегелай гъилихъ акьунаефе ерхьи агъзур исан кьабахъ Африкайиъ. Гебурикес агьалра кумак кея сувариъ дуламиш вере инсанарис. Сасагела дагибур узай аве дармандис. Туберкулёз кея инсанари ухай хьуная дармандин еринди.

Гин некк ппара муфеIэт кеяф хIисаб аркьа, фас пучин неккдигI ппара гIая итте песок хъара белок, амма лату чIукь гIая хIунин неккдигI далара. Дагин некк ишламиш аркьай вей хьуная хIуппаланра девейин некк суманди.

Дуьйил магьшурвел ая Iу вершна гIуьфцIур джуре дагибурин. Дагибур Iекул кея малар хIисаб аркьа. Нагагь ги хIисаб акьучин акьуная кардикес зарар вереф, мукьуйилас фиппур пучинара тIуршайдава. ХIейванди хьучин, гьукк аркьай весе учихъ хъахъуная къакъара фай уч кIесттегьен, даги гъузуна эркьва найчра датIуршай, училас къакъ алттивасттегьен.

Авала инсанди ппара хIуьлмат аркьайи дагибурис, ге хIисаб аркьафи хIуьрджал гъил суман. Найч кканчинара верегуна, даги фай верефи: IуькIерис, дараъди, гIараъди, хьед гъас. Дояркабури неккар ая хIа битIунар алийина гъарефи, хуппуриъ бабари шиникквар хулаъ артаф адавай гьинахъайра, фай верефи хIелбияри ийина, алийина дагил.

УхIас ппара рехIетинф э ме мал. Фи кканчинара Iелде, ачика мукь са гьакIан гъвад але мукь хьучин, гебурис чIевен ве. Гебурин къвац ппара цIуппеф э, идегуна лиIин дирхIучинра дагьарариас са тегIди руца даги. Джандин сагъвел цIуппеф ве, ирхе Iуьмурди илгванде. Ке хIа микьдар гебурин э кьадар хъаявел.

Гебурифас кар акьас ве муяд–йицIу сеIети са ягъа. Къемч руха дагис цIеса вазалалас хьидин ахираъ, сасагелай далара рухайдава гIудафанар. Некк фачиянде къемчдис ерхьи-ерчIу вазала, IуькIер IуьтIанас хъучучIа Iу хIефттайилас димари. Дагибур гьер джуре рангаринттар ая: джагварттар, кIареттар, хуршеттар хъара буреттар.

Жавгарат Хамазаева

Добавить комментарий

Ваш адрес email не будет опубликован. Обязательные поля помечены *