Дадара шиникквдира йирхIуна ая коронавирус давере руб

Агьал ппара унихьа хьес коронавирусдин вакцина акьуна аяв агъай. ХIапай ме чIал унихьа хIуькуматин курарил але инсанарикес. Фикьас пучин, ппара гьер джурайин яшарин инсанар завал вере мукьар э, хъара гебури эхIттият акьуна кканди ая чиппис коронавирус агъа иттал дахьас, хъара кеттдишас чиппикес сасрабурис.

Ке удигьай ме руб йирхIуттар хьуне духттурар, мегIелимар, хъара социальный работникар. «Коронавирусдин вакцина акьуна аяв чун?» агъа суал алихьуне чин Арсугъарин хIурин мактабиъ кар аркьая мегIелимдис Сеферов Гаджирамазан Рамазановичас, хъара мегIелимдин кIиркIас, Сеферов Сефер Гаджирамазановичас — Буршагъарин хIурин ФАПдин хIаттис.
— Гаджирамазан Рамазанович, чвас ме суал ппара унихьай ахьасе, засра алихьас кканди ая ме суал вакцинайихъас. Фиштти чун Iудари хъай кьастт акьуф ме руб йирхIас, чвас ме COVID-19 агъа иттал хьунев, хъара ме руб йирхIухаб фера хабар йинев джандин сагъвелдис?
— ХIекьди пасе зун, чин че хулаъ ая хизанар садра иттар хьундава, че хIуриъ иттаяттар ппара хьучира. Ке удигьай ме «Спутник-v» агъа дарманихъас зас ахъакьуна уйи зе кIиркIа. Ме учра медицинайиъ кар аркьай аяф э. Зун фикир акьуне, эхIттият идже э, зас суман зе илдешарис, багунттарисра пуна. Зун садпе компонент йирхIугуна, бицIи гучI гьуйи, амма фера хабар йиндава.
— Сефер Гаджирамазанович, вун фи гъа ме вакцинайихъас?
— Садпеф, ке удигьай гьер инсанди учихъас суман фикир акьуна кканди ая сасрабурихъасра. Зас ме иттал хьундава, амма руб йирхIас зун кьастт акьуне ме дарман аттархьугъилди, чин медицинайиъ кар аркьай аяттари ке удигьай эхIттият акьуна кканде час, хуппай фикир акьуна кканде аме инсанарихъасра, мишттин чIирхIе итталар ппара бадил дахьас.

Наибет Гасукаева

Добавить комментарий

Ваш адрес email не будет опубликован. Обязательные поля помечены *