ЧIинарихъас гъургъасе

Хье сувариъ, чIирариъ аруцагуна улис даргва джурейин тукарна IуькIер авейдава. КIилин Iуьмурди гьемисариъ яшамиш вейчинара, амма хIапай IуькIерин тукарин е ттурар ягIайдава, е дузди ишламиш акьуна кея муфеIэт кеттивас ягIайдава, е Iелеф деIелф ягIайдава. ЯгIаттара вахттар ккетвередегьен чIукь вея. Агьалдин шиниккварис са-садарис дала ягIайдава Iеле IуькIер.

Авала гIул хъучадеф башламиш аркьафи завал акьас гьер джурейин Iеле IуькIер: кьалар, кьаар. МехIелайиъ ая шиникквар джаллабурихъай завал верефи найч хьунара хъай ушуна завал акьас. Ппара верефи чIинарис, ккуярис, ибхIалин хIуярис, чIирин джихерарис, неккуцаярис.

Агьал суман авала шиниккварис ппара аверефдавуйи алтухъ ширин шейъ. ДехIела чиппи чиппис аркьафи Iуьркар. Сагелай верефи меркIвар атIас, хабди артафи гебур некк айчIвасттегьен. АйчIу некк завал акьуна руьхьефи са кьваниъ агьатуна IуьркI хьасттегьен.

ЧIинарихъас гъургъучин, ая мебур Iелеттара, даIелттара. Мебур дагIа инсандис четин э ягIар акьас, фас пичин алдай хIа джуревел адава Iелеттаринра даIелттарин. Ая кирхIуфна сад агъархъаттара.

Мебурин ая ярцIур джурейилас вартт. Ая мебур Iу иса агъучIаттар, ая хъихьуна гьер иса агъучIаттара. ЦIабар ирхвелихъди хIа ве ерхьи митри дегьен, мерIер фарта митIри уьркIевелдихъди.

Хьин чаб чиппилас агъучIуттар завал акьуна алакьун Iелчина, ая хIуькуматар мебур узуна хIа аркьаттар. Хабди ишламиш аркьа ямагаригI, джерехIвелдин рекьуьъра.

Ппара кумак хьефе чIинарикес инсанарис дегIвин вахттари гаш атIас.

Луиза Гусукаева