Чалтук АхIмад

Хьуне агъа, хьундава агъа Чатлук АхIмад. КIилди дуьяйин девлетарикес хъай хьуная михъ са хIейван. Ги хIейвандилди даркай хуппурар, узай мехIсулар учис чара аркьай хьуная ги. Кар адава вахттуни хIейвандин хъерт атай ахьуная ми батIар IуькI ае чIириъ.

Ама хIейван ягъалас ягъа гъариб вей ахьуная. Хиялин хьуная Чалтук АхIмад. Са ягъарикес са ягъа ушуная ме къаравул акьас. ХъикIина фачучIуна гъвандиф экьуная ме. Адиная са арайилас хIучна, сулна, багниш. Нубатилди алеркьвай хIейвандил чипис уйунар, хIанагар акьай ахьуная мебури. Хъадишина Чалтук АхIмад гъвандихъас, фацуная хьибудар шулугъчибур.

«Гьал зун чве баша акьасе», — пуная Чалтук АхIмада. Минатар аркьай ахьуная Чалтук АхIмадас хIучна, сулна, багниш.
«Дади-бидади гъил гъушан, — пуная мебури. — Чак кимата, чафас аттрукьа иджвел акьасе чин васра».
«Фи иджвел аттрукьаси чвафас зас акьас?» — пуная Чалтук АхIмада.
«Зун вас са кьаратI хIуппар гъасе», — пуная хIуча.
«Зун вахъай весе варварин мугар ая усаъди. Тисаъ ацIуна уьттар ая», — пуная багниши.
«Захъ вас ицIанф фера хъадава, ама мус хьунара зунра герек хьасе», — пуная сула.
Сасра ягъан багами къапуйихъ хъатай кетIуная Чалтук АхIмад. Аттушуная ме гIанаъди, дахъуная къапу. Гисахъ хъикуна ахьуная са кIаратI хIуппара ачадиная хIуч. Магьа, пуная хIуча, зун зе гаф Iуд акьундава. Джуре ягъа багами адиная багниш. Шаб, пуная ми Чалтук АхIмадас, уьттар гъас. Рукьуная мебур дараъди. Хьал зун вун IуьтIанасе, пуная багниши.
«Я илдеш, хье кар лишттинф давуйихи», — пуная Чалтук АхIмада.
«Зас фера ягIайдева», — пуная багниши.
«Я Чалтук АхIмад» ун архъай унихьуная мебурис.
«Гьай», — пуная Чалтук АхIмада.
«Зун сул», — пуная мис сула, — «мисаъ гIурчахъанар ая багнишихъас адаркай, багниш агунев вас?»
«Агундва уп, агундава уп», — пуная багниши. Хьуная багнишис гучI.
«Агундава», — пуная Чалтук АхIмада.
«Ле ве удигь хьаяф фуш э?» — пуная сула.
«ТIеркIуьуб уп», — пуная багниши.
«ТIеркIуьб э», — пуная Чалтук АхIмада.
«ТIеркIуьбик ибрар кевей авев?» — пуная сула.
«Даран кул э уп», — пуная багниши.
«Кулар э», — пуная Чалтук АхIмада.
«Кулар ичин са дагьра аладив», — пуная сула.
«Яваштти аладив», — пуна Iешуная багниш.
«Сара зун вахъ хъугъас андава», — пуна Чалтук АхIмада, ихьуна кIилиъ дагьра, кьес акьуная багниш.
Адиная сул Чалтук АхIмадахъди.
«Махьа, ягIа зунра герек хьуне вас», — пуная сула.
Гьегишттира пуна сул ушуная дараъди. Ихьуна учин бакариъ уьттра Чалтук АхIмад ушуная учин хулаъди. АцIуна девлетар алтухъ хьуная Чалтук АхIмадан.
Расим Гучудадов

Добавить комментарий

Ваш адрес email не будет опубликован. Обязательные поля помечены *