Хье хIуькуматиъ 2010-пе исалас аттархьуне гьер джурейин госпрограммабур: «100 школ» агъаф, «Земский доктор», «Земский учитель», «Комфортная городская среда», хъара сасра джурейин ттурар алдеттар. Мебур кIилди арайил акьунафе хье хIуькумати инсанарис курарин мункинвел хьурай пуна, кар акьас кканди ая инсанарис кумак бадала.
«Земский учитель» агъа программа арайил акьуне хье хIуькуматин хIатти В. Путина 19-пе февральди 2019-пе иса. Ме программайилди йиная мункинвел шагьурариъ дуламиш вея мегIелимдин гIилмин диплом фаттарис кар акьас бицIи хIурариъ. Ме программайин шартIар э маслихIет акьуна 5 исан арайи дуламиш вей хIурариъ, махьтабиъ кар акьас.
Хье Агъул райондиди 2021-пе иса ме программайилди кар акьас Буршагъарин хIуриъ мункинвел хьуне Имамаева Нармиля Магомедзафировнайис. Гьеме кардихъас чин са-Iу суалар алихьуне Нармиля Магомедзафировнайис.
— Салам алейкум, Нармиля Магомедзафировна. Ке удигьай хье ахттилатин зас мубарак акьас кканде чвас чун аркьая иджвелин кар. Чвас сагъвелар, сабур, кьуват йирай.
— Чугъсагъул чвас батIар насихIетарихъас!
— Нармиля Магомедзафировна, ахъакь вун час ве Iуьмурдихъас, хизанарихъас, фиштти ме кардис вун кьастт акьунайчин.
— Зун хуф э Агъул райондин Буршагъарин хIуриъ 1989-пе иса. 2006 иса ккиркIуне махьтаб. УчIуне хурас Махачкала шагьурдин Дагестанский государственный университетиъ, специальность «Биолог». 2011-пе иса ккиркIуне хурубар. Амма хуруб ккиркIугъилди кар акьас зас мункинвел хьундава, фас пичин, шиникквар бицIи уйи. Хъая чахъ хьибу шиниккв. ХIуриди адестти чин яшамиш вей уйи Каспийск шагьурдиъ. Мисаъ чин ачмиш акьуне бицIи суман хулас герек вере шейэр ая дукан. Сасагелай эркин вахттуни зунра кумак аркьайи зе хизандис. Зе фикирди уйи шиникквар хIа хьуна арайил хьегъилди кар акьас шагьурдиъ махьтабиъ. Хабди хабархьуне зас хье хIуькуматиъ аттархьуна ае цIае программайихъас. ЯгIайин ягъас дуньяйиъ ая хабарар унихьас ппара мункинвелар ая, хIапай ме кардис кумак аркьа интернети. Гьемиштти зас хабар хьуне ме цIае «Земский учитель» агъа программайилди че хIурин махьтаби мегIелимар кьабул аркьая пуна. Цац, шиникквари махьтабариъ хура вахттар хъучаверегунас, зун хIезур акьуне лазим вере кIеджар ме программайин конкурсдиди. Зе бахттунис, зун кьабул акьуне. 2021-пе иса сентябрьдин вазала зун башламиш акьуне Буршагъарин махьтабиъ биологинра химин мегIелимвелди кар акьас. Инсандин е гIешкъ ай кканде, е кьастт. Зун хIисаб аркьа, гIешкъ ая кардис рекъра ачухъ ве.
— Нармиля Магомедзафировна, фиштти кьабул акьуне ве тIалаб, ве кьастт хизанди, багу-кIилари? Агьал хIапай джигьиларин мурад э шагьурдиъ дуламиш хьас, кар акьас.
— Чин Iудара хIуриъ хIа хьуттар э. Зе дадар-бабар хIуриъ ая, хъара багунттар, зеттар суман, зе хизандинттара ая. Агьал хIурариъ авалдин вахттари суман читинвелар андава. Магьа зун кар аркьай хьуная суре ис. Зас са багухъасра читинвел аргвай адава ягIайин ягъас хIуриъ. Зас кIвалди аме, зун бицIи агуна, фидегьен читинди дуламишвел аркьайи хIуриъ ая инсанари. ЯгIайин ягъас, хIуриди варха ичира, рекъ ая, хулади рукьуна хьед файдина ая, кар ая.
— Нармиля Магомедзафировна, аяв читинвелар махьтабиъ кар акьас илдешарихъай, шиниккварихъай?
— Садпеф, шиникквар махьтабариъ авалдин вахттари суман ппара андава, Iудпеф, са багухъасра читинвелар махьтабира адава. Махьтабариъ акьуная батIар ремонтар, ибгIавелар, авалдин вахттари суман куппарилди пичариъ цIабурар аркьай андава. Гьер кабинетар цIаегъилди ухшар акьуная, ая мункинвел интернет ишламиш акьас. Агьал гьемиштти ачухъвелар ай, кар акьас нуш ве хIуриъ. Илдешар че махьтабиъ джалла дуьхьуьттаре. Пас кканде ппара хIа чугъсагъул махьтабин директордис Рамазанов Алавдин Абдулмаликовичас, хъара завучас Магарамов Руслан Шабановичас, гебури дивая джафайихъас махьтаб бадала, шиниккварин хурубар бадала.
Наибет Гасукаева
