Каидова Феризат Курбанкадиевна хуная 1962 иса, Агъул райондин, Буршагъарин хIуриъ са хIа иджи хIуьлматлу хизандиъ. Гин дадас агъафе Кьулбанкьади, ге хуная 1930 иса, Буршагъаъ. Феризатан дада хуруна ккиркIуфе ветеринарный факультет ДГСХИйин Махачкала шагьурдиъ. КкиркIухаб кар аркьай хьуная хубджи гагьди Гъваъ, маларин духттурвелди. Хабди адиная кар акьас Типпигъди ветстанциъ. Са Iу исалас ушуная кар акьас учин хIуриъди.
Гисаъ Кьулбанкьади ерчIу иса кар акьуная председательвелди колхоздин. Хабди кар аркьай ахьуная Буршагъаринра Арсугъарин «Дзержинского» агъа колхоздин маларин духттурвелди. Джалла хIурариъ, иджефе агъа тур а духттур и ге. БатIарди учин кар ягIафи гис.
«Са гIеджиз, ашкIин хьиран дуьгIе хъайа
захъ», — агъайи че дада. Фас пучин, ге хьиран
хъая хъадава са хIуни, операция акьуна сагъ
акуная че дада. Ге хьира ацIуна дуьгIебур акьуная че дадас», — ахъаркьайи гин руша, Феризата. Дад кIиная 1995 иса.
Феризатан бабан ттур э Магомедова Нафисат, хуная 1932 иса Буршагъарин хIуриъ.
Гин баб э идже мегIелим кьуръан ягIаф,
БагьавудинхIеджин руш. Дахи ушуфе гин дад
кегIбайилди. БагьавудинхIеджи Дербентин хIа мазгитаъ къа истти кар аркьай хIунаяфе. Къа чIал ягIа идеми и ге. Мебурихъ хъайуйи йицIу шиникв. Са руш бицIи ами кIиная, илгуная мебур ерчIуд.
Феризат Курбанкадиенва бицIи классар
ккиркIухаб Буршагъаъ, ушуная аме классар хурас Типпигъди. Мисаъ Iу исадала илгуна адава ге. Феризат хаб адиная учин хIуриъди, Буршагъ дахъухIела хIа классар. Муядпе класс ккиркIухаб хаб ушуная ме Типпигъди,
ерцIудпе, йицIудпе классар хурас. Мактаб
ккиркIухаб 1980 иса, ушуная Феризат заочно
хурас ДГПИйиъ бицIи классарин
мегIелимарин факультетиъ.
ЦIайи кар аркьай хьуная Феризата пионервожатыйвелди. Хабди хьуная гикес
бицIиттарин мегIелим. Сара тегунахаб илгуная Феризат мегIелимвелди кар аркьай Буршагъарин мактабиъ. БатIарди кар аркьахIела гидас гьикуная ге «Орленок» лагерьдиъди, сад хье кIилин Агъул райондиас. Хье Дагъусттандиас тисаъ ахьуная кIилди 42 инсан, гьетебуригI гIахьуная мера.
Лагерьдиъра батIарди кар акьас ягIар акьуная мебурис. Феризат Курбанкадиевнайис хье райондиасра ая ацIуна наградабур, грамотабур, сертификатар. Цац йиная гис ттура «Почетный работник народного образования РФ».
«Сур грамотабур, че мактаб ккегъдивагуна,
илгуна тисаъ чIирхьуне зе. ЧIалра дапуна зас,
аттивас хьундава зафас зе документар мактабиас. Нахьчира дагIай гулуне зе са
пай документар», — ахъркьа Феризата.
«Зе кар зун кIилилас алдихьагъилди акьуфттава мусракегьей. Мусхьучира зе шиникквари агвар аркьафе хурубаас зурбадалди. Че дада агъафи зас: «Вас шиникквар дакканхаб, маркьа мегIелимвелди кар. Кар аркьахаб, акье муфеIет кей».
Ге чIалар че дадан зе кьацIра кIвалас вейдава. ДехIела зун кар акьас алучIа йиркIураастти. Унархъай хулаъдира гъарефе зун шиникквар дарсар ягIар акьас, каникуларин вахттуниъра», — агъа Феризат Курбанкадиевнайи.
Феризат Курбанкадиевнайихъ хъая гIифу шиниккв: хьибу кIиркIна Iу руш. Муса хуная 1984 иса, хуруная Дагестанский
механический техникум. Кар аркьая 2010 исалас АО «Черномортранснефть» садпе категорин техниквелди. Iели хуная 1987 иса. Мактаб ккиркIухаб ушуная Махачкалайиъди. Хуруная пединститутиъ. Тисаъ кар аркьай экуная, учин дуламиш аркьай. Джарият хуная 1989 иса. Хуруная пединститутиъ. Агьал кар аркьай ая мактабиъ мегIелимвелди. Iуьмар хуная 1992 иса. Хуруная автодорожный институтиъ. Кар аркай экьуная Махачкалайиъ.
Саимат хуная 1994 иса. Мактаб хуруна ккиркIухаб ушуная хурас медколледждиъ , са
исадала дахуруна ушуная тидас медакадемиъди. КкиркIуная ге ус хуруна. Кар аркьай адава, бицIи шиниккв хъай.
Хъара джандиъ сагъвел хьурай ве, Феризат, иджи кар акьас.
Нафият Шамсудинова
