Хаварсузди дегIуь хьуне,
Хье джигьилар фацас кканхьуне.
Душмандикес хавар хьуне,
Хье джигьилар задил хьуне.
ДегIуь сахтте гIвая,
Душман хьехъди багу гIвая.
Баварис хавар давай,
Джигьилар хIезур гIвая.
Бавагьди геда адине,
Гуни хIезур акье пуне:
— Зун хIуппарихъ багагь гIвая,
Са хIефттайи ахьасттава.
Багами бав гъайишагунас
Геда рекъуьъ учIуне,
Бавас дард гIварегунас
Ягъа манзили хьуне.
Бав багами кетIуне,
ХIанивар фай ушуне,
ДегIуькес хавар хьуне,
Баван йиркIураъ дард хьуне.
ХIелакди халади адине,
Рушан гардандиъ архьуне.
— Хье геда дегIуьди ушуне, —
Бава рушасра упуне.
Бавна руш Iешай хьуне
Залумат ерхе ягъди,
Улардалас негъвар гIвайи
Рухаъ ая хьед суман.
— Агьал адесе зе геда, —
Бава фикир акьайи.
— Агьал адесе зе чу, —
Ччиччи фикир акьайи.
Исар ппара ушуне,
Баван йиркIураъ геда аме,
Са ягъарикес са ягъа
Геда халади ачаес пуна.
Адесе геда агъай,
Хиял кей бав Iуьсе хьуне.
Уларисра дагуна
Дуьйиласра ушуне.
Хьимуд агьан гиштти бавар,
Джигьилар хав дарукьуттар,
Я завардал алдаваттар,
Я джилардал даджикIиттар.
Хьимудна хьимуд джигьилар
Пуч хьуна дуьйилас ушуттар,
ХIуьларинра заварин хьуна,
Хав халади дарукьуттар.
Катиб Ашурбекович Исаев, с.Мисси
