БархIачарин ХIадад — колхоздин неджбер

БархIачарин Ибичаев ХIадад хуная 1922 иса Типпигъарин хIуриъ. Учин дад гис кьацIра ягIаф дава, ге лап бицIи ами кIинафе. Ме кехIа шиниккв и хулаъ, дехIела мил алчархIуная ппара кар. БицIигунан хаб ми учин бабахъай акьуная курар гьерджурайин мукьариъ. Бабафас агъдарукьай, мил алчархIуная ппара загьмат.
Дербентиас мич хъахъуна кьваран шишилар гъайхьуная ми. Хабди кIиная гин бабра. ХIададахъ хъай уйи Iу чура. Гебурис агъафи Рамазанра, РахIим. Хьуная мебурикес ятумар. Чиппи чиппин дуламиш акьуная мебури, гьер джурайин курар аркьай. ХIахьехаб, учин кIилин уьмурди ХIадада кар акьуная колхоздиъ хIуппаринра маларин бригадирвелди, хъара ге и мастер неккар, нисар, ччамарин.

Гин чуппарира кIилин Iуьмурди курар аркьай хьуная колхоздиъ. РахIим и хIуьппехъен, Рамазана фи кар учис фачархьучин, гьате кар аркьай ахьуная. Хабди Рамазан айчIуна ушуная галуъди учин хизанара хъай. Тидас инфаркт хьуна, кIина файдиная хIуриъди.

ХIададан хизандис агъафе Байранкъиз. Ибичаеча Байранкъиз Малагусейновна хуная 1922 иса. Мебур уйи гIифу шиниккв: хьибу рушна Iу кIиркI. Байранкъиз мебурин кехIа руш э. Байранкъизан дадра дахи кIиная. Гебур ухIуная садтти баба. Байранкъизал алчархIуная ппара загьматар, бабас кумак аркьай бицIиттар хIа акьас. Байранкъизан са чура, МаллахIуьсейни агъаф, са чира, ХIабаб агъаф, лап дахи кIиная. ХIадад агъа чура, БицIируш агъа чи кIиная кьанди. Шувас весттегьен, Байранкъиза кар акьуная колхоздиъ, учис фачархьу гьер джурайин курар аркьай. Шувас файшухаб, ги сагелай кар акьуная райондин больницайиъ поварвелди, хуппай санитаркавелди. Хабди, уч пенсиъди весттегьен, ги кар акьуная прачкавелди гьеге больницайиъ.

ХIададахъна Байранкъизахъ хъай уйи муяд шиникквар: гIуьфу рушна хьибу кIиркI. Садпе
кIиркIна ке бицIи Iу руш кIиная бицIи ами. Илгуная гIуьфу шиниккв. Гебурис агъафе: Фатимат, Барият, Зарият, БицIирамазан, Ибригьим.

Фатимат Гададовна хуная 1951 иса. Мактаб
ккиркIухаб ге ушуная Дербент шагьурдиъ хурас медучилищейиъди. Хуруна ккиркIухаб адиная хIуриъди кар акьас фельдшер — акушеркавелди. Ерхьи вазала хьуная ме кар аркьай ЧIаъ. Хабди адиная кар акьас райондин больницайиъди. Ме больницайиъ ги дакьу кар хьуна адава: патронажная сестравелди, операционная сестравелди, детская сестравелди, рентгенологдин сестравелди, хирургийиъ, терапийиъ медсестравелди. Ме сеIети кар аркьай ая скорая помощьдиъ. 49 ис э ФатIимата больницайиъ кар аркьай.

Барият Гададовна хуная 1952 иса. Ге йицIудпе класс кIиркIухаб ушуная хурас педучилище Буйнакск шагьурдиъ. Хурун ккиркIун адихаб агьалдисттегьен кар аркьай ая Типпигъарин мактабиъ, бицIиттарин мегIелимвелди.

БицIирамазан хуная 1954 иса. ЙицIудпе класс ккиркIухаб ушуная Саратов шагьурдиъ сельхозин иститутиъ хурас. Экзаменара йина
хурас адекьуна хаб адиная хIуриъди. Хаб ушуная Махачкалайиъди хурас университетиъ математический факультет. Тисаъра Iу исадала дахуруна айчIуна адиная хIуриъди. ХIуриъ гьерджурайин курара аркьай экьуная. БицIирамазан кIине 2006 иса.

Зарият Гададовна хуная 1956 иса. Мактаб ккиркIухаб ушуная хурас пединститутиъ, иностранный факультет, Махачкала шагьурдиъ. Хурун ккиркIухаб ушуная шувас, хъай учин хизанара айчIуна ушуная Орел шагьурдиъ. Гьетегунанхаб аркьай тисаъ мактабиъ кар экьуная.

Ибригьим Гададович хуная 1957 иса. ЙицIудпе класс ккиркIухаб ушуная хурас политехнический институтиъ, инженерарин факультет, Махачкала шагьурдиъ. Хуруна ккиркIухаб кар аркай хьуная, СССР далгъуна завод хъикIасттегьен, заводиъ главный инженервелди Махачкала шагьурдиъ. Хабди гьерджурайин курара аркьай экьуная.

Гашар, мекIер хьас атуна адава ХIададана Байранкъиза чиппин валадарис. Чиппивас агърукьагъилди иджвелара акьуная гебури
чиппин шиниккварис. Байранкиз киная 1992 иса, 70 ис дала дахьуна. ХIадад кIиная 2004 иса, 82 ис хьуна.

Нафият Шамсудинова