Авалдин вахттарин хулар

Гьалдин вахттари э хьефас хIурин найисагькканчи хал акьас вереф: гIаттархуна хIуригIас, хъаттарку мукьуйиъ. Авалдин вахттари кьацIраминдавай джурегъилди и хIурар ккийибар, хулар акьубар вереф. Гьер хIурин хулар аркьа мукьара авейи, уза хуппурарин джилар джурейи авейи, мал фарта чIирара авейи.

Хулар аркьайи авала фатIуна, хъукъуна – гIукъуна. Ге кардин ппара иджвелар уйи: джиларин  есра вейдавуйи; са цал Iу хулагI гIай авейи,  загьмат ппара дадивас; кулакаригьас, ая зараригьас далда вейи. Хъара авала хулар фатIуна аркьайи къачагъаригьас, душманаригьас далда хьас.

Хъуькъуна акьуб кидавай, чун ул фатучи хулар акьуна авейи дагьарарин къирагъарил, кIунтIарил, са багулихъас е Iу багулихъас далда верегъилди чиппилди дегIви акьас адеттаригьас. Майдан мукьуйил акьуна са хIурьа авейдавуйи. Агьал хIурар далгъуна, ичина хIа хьуна ая манзиларилди, амма хIурарин бина ккийи мукьар аяф зун агъагъилди э.

Хьин хъуттурфучи ЧIаарин хIурихъ хьес агвасе хулар адавайчира Iари къала суман, хуларин цаларсара  гъадивуф  куькIас  даверегъилди ве хIур. Гиштти э аяф Бедухъарин, Хьирагъарин, Тпигъарин хъара сае хIурариъра. Гиштти хьугуна ваалди душман адичира гIаджиз мукьар чIукь вейи, дегIви акьас са къайда манзил фацуна вейи, инсанара гьуркIагъилди.

Ге кардира ппара хIа багьана хьуна кумак хьуна ахьасе  дагьараригI  гIая хье гIеджиз халкьдис. Iайи хIа кьушумаригьас далда давейчира, чиппин кар аркьайи гебури. Миштти аркьаф са кардихъассара и.Уза мукьар чIукь уйи. Агьал суман гIур – кьур адиас гъайдавуйи.

Алттушуне те заманабура,те вахттари акьу цалара са пай арчIуна ая, са пай ягIа – багагь агъафсуман ая. Цалар амилгучира, гебур далда суман ишламиш акьас хьеал алчадархьурай. ЧIукь агуна адава  хье халкьдис читинвелара, гашинвелара, мекIера, гьалдин хаб дехIера йиркIурас рехIетти дуламиш хьурай дагьарариъ дуламиш  аркьай ая  халкьдин!

Добавить комментарий

Ваш e-mail не будет опубликован. Обязательные поля помечены *