Авалан хуларин фурсар

Кьанди хьес ппара унихьа агьалдин джигьилар хурас учIа цIае аттархьуная дизайнер агъа пеша хьас, хулар, хуларин гIанар батIар акьас ягIар акьас. Амма авалдин вахттари ппара гишттин пеша кея инсанар адайчира, гьер хулан эесси, хулагIан алучIайи учингъилди​ батIар акьас, хулан гIанаъ фурсар акьас. Гьерттин фурс хIисаб аркьайи учин гьавайихъ, кьвачIайихъ хъуттурфуна. Хъара те вахттари агьалдин заманайи суман ппара мункинвел адавуйи кканегъилди фурсар акьас. Вахттар-заманабурихъ хъуттурфуна гьер хулагIан алучIайи учин Iекьулилди, Iемалилди мерттвелилди ухIас учин уджагъ. ХIа уджагъар ппара хулар аяттар, гебур верефе кьвачIа алдея инсанаринттар. Уджагъар верефе Iу-хьибу хал аяттар. Сад эркьва хал э, сад — тавур хал, хъара хазин хал. Хулан гъвад верефи цIагъунари алахъуф, джил верефи ругунф, тIагарар аркьафи бицIи кей кIуранинттар. Са пай инсанари аркьайи са тIагар гъвадиас адихьуна. Аркьафи гишттин тIагар хулаъ​ батIарди Iекв архьурай пуна. Джил хулан верефи ругунф, акуруна чулле цIамцIулди. Цалар акуранф и кираджайилди. Эркьва хал гьемишан ишламиш аркьа лекукк ккеяф и. Мисаъ аверефи мац, ке лазим вереф ибгIавелдис. Мац аркьафи хулан муртуъ. Мацун багулиф аркьафи ишламиш аркьа ахун, лехIефарин цIуд. Джиликк аккихьафи берхел, кьвадилкьван, эркьва усаъ аккихьаф кьудакь, мекI дахьас. Хъара ге кьудакь ишламиш аркьайи къулгун аркьагуна аккихьас. Тавур верефе гIаттиву хал. Нагагь гъурбатиас аде гIалашуй хьучин, ачикас. Тавур хал хIисаб аркьайи ке батIар, фурсунин хал. Ме хулаъ аккихьафи ке батIар кьвадилкьван, цаликес кейхьафи батIар багьайин кьумашин парда, хъаяттари кьвадилкьван, халича. Авала ппара мебелар аяфдавуй. Ихьафи ге хулаъ са сандукь, хъаяттари Iудра. Сундукь сад верефи кьумашар, ягълукъар икIуф, сасра — кунар икIаф. Са багукди ихьафи рукьан кIилар хъая карават, илийина хъаядегьен ахунарна лехIефар. Алчихьафи караватил харайин пакривал, хуппай алиянди караватил гIаттивуная хъаядегьен Iурдеккенар, алчихьунхаб батIар къири. Хазин хал верефе ке пара шейъ ахъунаяф. Ме хулаъ хIапай аверефи ишламиш аркьа къаб, тур, хIуьяг. Хъара авейи ишламиш аркьа Iеле шейъэр. Ме хулан цалиъ аркьа ппара гъулар, ишламиш аркьа къабар хIуьягар икIас. Хъара ме хулан цалиъ аве кьинар, фурсунин къабар, тIабакIар, кейхьас гьертти учи хъаяф. Ихьафи тах, гIур, кьур ахъас, хъара саиштти ишламиш аркьа Iеле шейъ ахъас. Гьертти учин аттрукьагъилди батIар аркьайи хулан гIан.

Наибат Гасукаева

Добавить комментарий

Ваш адрес email не будет опубликован. Обязательные поля помечены *