Авалан гьер джуре кIилил алархъаттар

Хье Дагъусттандин вилаятиъ ппара миллатар ая. Гьер са миллатихъ учин гIедатар хъая. ГIедатар пугуна ме инсанарис чиппин экьуб–гъузуб, аликIуб, гъургъуб ягIархьеб э. Хье халкьар авалдилас мич гъавурдиъ аяттаре ме кардин.

Мебурихъ хъая лекулас кIилилди чиппин аликIа гIедатин кунар. Ме кунарикес ке ппара хумбеттин агуб ухьтан аркьаф кIилил алархъатти э. КIилил алархъаттаринра гьер джуребур ая: ягълукъ, кIеб, къуч хъара сасрабура. Алттушу асирдиъ хье дишагьлибури ишламиш аркьадегьен джуребур агуна лап муьхIтал вейи Дагъусттанди аде гIелимар, шаирар, сафарчибур. Гьеме джуребурикес чIукь духIуба хьучира къуч хъая хIа пай миллатарихъ.

Дишагьлин кIилил алахъувелдихъ хъуттурфуна ягIарвереф и авала гин яш, хулан хIел, кьуват. Шувас душуная джигьилари чIар ккедикIуна алахъучира ягълукъ, шувас ушуна хулан хизандин эесси хьуная хумбари чIарар аргвас артафттавуйи. АликIуна къуч цIуппе аркьафи кIил, вартталас алархъафи кIеб.

Учин дуькьу тагьарихъас гъургъучин къуч э кIилихъас хъайтIан усна гIунарихъди алайхьа шишал суман ус. Шишалиди ихьуна кучарара хъайтIанфи ме кIилихъас. Шишалин ирхевел аслу и хизандин девлетилас. Девлет ппара хъаяттари дуьркьанди лекун кIутарихъ ахъарта ирхевел ай. ГIеджизари хьудегьен джикъи аркьайи.

Дуьркьанфи къуч са рангунин гIетIласин, сатинин, е дахьучин батIар IурчIе читтин кьумашарикес. Iурдис аликIас дуьркьанди хьейин ибгIа кьумашикес.

Удигьас тич дуькьуна ккеттиланфи джуре рангунин чукь Iекве суман кьумашин чIил. Ме чIил абанкьулдилас дивуна хъайтIанфи гIунарихъди. Гьергелай кьумаш гъушанас аттдарукьаттари чиппис хIилла акьуна дуьркьанди хъамилгу кьурцарикес. Дуькьуна ккиркIухаб чIирхIи аргвайдавуйи мебура.

Хъара кьуват ппара хъаяттари батIарди агвас кикIайи мик арсуран чалар, манатар, гIебасибур. Джигьилари бицIиди ккедикIуна артафи IатIуб. Хулан кайвани хумбари къучун гIунарбагук ккикIайи джибин, мисаъ чиппин пул, идеф-даваф афикIас. Iусеттари цIуппе акьуна аликIафи чIарар дагвас. ДехIела мебури са чIил сара ккейтIанди кIилин хIуьттехIилас кIампуриккди, къуч кIилилас аладавес. Агъаф и мисс салбан.

Агьалра аликIай аме миштти, амма авалдин къучарив фачикIучин Iайи джуре хьуная мебур.

Салихат Малагусейнова