Авал заманайин инсанарис дегIвин вахттара, гашра, мекIра агуная, ппара четинвелар алчархьуная. Те вахттари
ппара гIезабар гъадивуная инсанари: Iеле гуни, аликIа кан адавай, экьвас халра хъудавай.
Фидегьен четинди айчинра ппара шиникквар хъая хизанар са хулаъ яшамиш вейи. Ая хулара сад сайил алгъикIуна и акьунаяф, сайин тIагар сасрайин хулагъилди аттархьагъилди. Алтухъ джилар хъудавуйи халкьдихъ, хъаттара и гIане хуппурар, гьертти чиппис кьур, гIуй узаттар. ХIапай джилар фавейи колхозарив.
Хабди хьуне совхозар. Те четин замана алттархьехаб инсанари бицIибицIи акьас хъучучIуне хулар. Чиппис
хизанар акьуна арайил хьехаб, хIа шиникквар чиппис хал, мукь акьуна дадар бабаригIас гIайчIвайи, мебурис
хIуькумати ирцIанди хал аркьа джил.
Амма гъалдин вахтунихъ хъуттурфуна, те заманайи хал акьубра рехIетин кар давуйи. Ке цIайи хал акьас фундамент рукIагуна унархъайи кумакис. Садтти рукIас аттрукьа кар
давахIела. Гъвандин цал аркьа усттабура ппарагIди фачархьайдавуйи, дехIела багукIилинттар кумак бадалди хъулиханди устабурихъ.
Хулар аркьай нецIун гъвандикес. НецIун къирагъар хъацIуна авейи завал акьуна гъванарин пусари, гьертти чиппис нецIугIас гIаттивай. Цалар агъдивуна ккиркIухаб алдихьуна цIагъунара хал алархъайи.
Ме цIагъунарин кар ппара четинфи, пул йина гъулан усра адавай, мебур атIас ушуна кканвейи Магъуъди, лап гьавабуриас хъучIирхIай адагъайи. Iаре са гъвад алархъай пуна ппара загьмат гъадивайи: сагелай цIагъунар ккедихьайи, хабди алархъайи алакьуна муккурар,
чIимгелар. Гебурин вартталди алархъайи са хубджи ругра, хабди алиланди гъвад.
Ме варттал багварин курар ккиркIухаб хъучучIа гIана багварин курар. Мисаъра ке четин кар э джалла хуларин цаларис луз йирхьуб. Ме кар акьасттира хал аркьа эесси унархъайи кумакис мил акьас пуна. Луз аларкьастти кертайи бурце руг, музе къуттар гIадахъас.
Хабди ге ругугI гIархъайи фурд, сумар, хуппай батIарди атайи
муркI. Луз рукъухаб хуларин гIанар акуранди кираджайилди.
Четинвелдихъ хъуттудурфуна хулара аркьайи Iу мартабаринттар. Авалдин загьматихъ хъуттурфуна агьал ппара рехIетвелар хьуная хулар аркьаттарис.
Батитай Габибулаева
