Бабанра дадан авал заманайин хаб мурад э чиппин шиникквар идже рекъуьл акьас. Рекъ-радж, гlедат-lейиб нае вахттуниъ ичинра аверефе. Авалахъ хъуттурфуна гьалдин заманайиъ иджвелар хьуная.

Хьидин lуьшуй, хlа ягъари сусарис гъарефи сусан паяр агъай батlар шейъэр: Iуьтlубарикесра ягълукъар-кьумашарикесра. Гьал суман батlар шейъэр адавуйи, аяттарикес чарабур аркьайи. Те вахттари гьертти чиппин аттрукьагъилди ахъартайи шиберихъ.

Са lерабайиъ икlуна ахун, лехlеф, lу lурдеккен, сундукь, кьвадилкьван, палас, берхел, аттрукьаттари — lу-lудтти дахьучин, сад. Къабар-къуджагъар тек-туькдивас дала ахъатас вейдавуйи. Таш, ифан гвар, гаджин, са хlуьягна, са шишна ттура кlуранинф.

Iеле задарикес ирцIанди: бадра ччаман, ихьуна са хlа хlуьягиъ аркьайи lесида. Тlабакlиъ агьатуна рушас, амеф пай аркьайи мукьун-кlилинттарис. Са ишиг къайфатар, кьутlурар, рукъу яккунттар, гъурагъалар. Сундукьин шейъэрикес: ахъартайи гьер джурейин кьумашар, гьал суман хlезур кунар адавуйи, чиппи гъилари дуьркьанди.

Нагагь хъая са руш хьучин, гис кулар кея берхlем, тукар кея хьейин ягълукъ, сатиндин ирхе шалвар харайин зуранара хъай, са ппара аликlа лекар. Шагьурдиъ ушуна хъая рушас са тафтайин кьумаш, сатин, читтинф, лавсан ягълукъара хьейин кьумашра. Ягълукъарикесра ахъартайи баба учин рушас, хьейинф гъазеф Бакуйин палатнуйинттар, бембегинттар, келагъанар, харайчекар цlимилар хъаяттар, са lу штапелдин бицlи ягълукъара гьер джурейинттар.

Хъаяттари: са пардара, бембегин гlедиялра, гвегlенар ахъартайи хьейинттар къваркъвариккди язнайин хизан хьимуд айчин, хъара мирасарисра, мукьунттарисра. Ле кидавай хъара са арсуран тlубул, арсуран кваниш, бицlи-цlуьре арсуран бицlбицlаяр, хъаяттари са калушара. Малар-хlуппарикес са кlерухъра, хьибу чаравара.

Хlейван ва даги хъайчин девлетари ахъартайи гьебеяр, хурджинар, хьучин пурарил алчихьайи бицlи халичара. Шейъэриъ дава кар аяф, язнайис сус мубарак хьурай. Агъа чlалариъ, дава кар аяф, бахттар азманттар lуйин хьурай.

Руслан Магарамов