Iурдис инсанари цулана хIезур аркьа гванас якк. Авала холодильникар адава вахттари ухIас вейдавуйи чIетте якк, дехIела инсанари кIвал аркьайи гьер джурайин Iемалар. Амма джаллабурилас ке идже Iемал – рукъас акьуб якк. Яккухъай хъара аркьа ацIу рудра рукъас, ласккара аркьа.

Мебур акьас хIезур аркьа рудар. Рудар сагелай батIарди Iуьрччанде, хабди икIа кьелан хьеттиъ са ягъа, хуппай хъара Iуьрччанде батIарди джагвар хьасттегьен.

Ласккарис йиркIвар-лекIер фарта якк ата машиниас, чIичIакI, бурунз, исивут, уникI гIахъуна са чIукь хьедра агIатуна арцIа рудар, хабди гIихьуна хIуьягигI руьхье. Мебур акьуфна сад Iелеттаре.

АцIу руд аркьафе якк икlуна. Музе акьуна е малдин е чаравайин якк фарта якк ата машиниас. МисагI гIархъа кьел, исивут, хIешвар, уникIер, йирхIуна гъилра арта са ягъа. Хуппай арцIа рудар, хъайтIуна Iудар кIилара ададавес. АцIуна ккиркIухаб алчихьуна са чаппра гьавайил арта рукъас, ке чIукь Iу хIефттайи.

Са ппараттари цалигI гIачирхIуна хъертара алчахъуна рукъа. Иджи рукъудегьен ппара ухIасра ве мебур. АцIу руд барамбарди яккухъай ишламиш аркьа. Масса ирцIанчинра мебурин кьимат багьа э яккулас. ДехIела агьал ацIунабури аркьай масса ирцIанде мебур. Iурдана ацIу рудра гIихьуна аркьа хIа хинкIар, бицIи хинкIар, кьутIурил алархъа.

Луиза Гусукаева