Хулан тукус алоэ агъаттис, агъай аве Iеламатинф э пуна, гин цIабариъ ая IашугI гIая ацlуна идже витаминар, инсанари ишламиш аркьай аве верш исар ккеттушуна айчинара кегьей. Желе суманф ичинара алоэйин цIабуъ аяф 99% хьед э. Ме тукун ватан э Северная Африка.

ТабиIетиъ гьучархьа Iари ибгIа мукьариъ. Амма хье дуьйил ппараттари хулариъ ухIа ме тук. Алоэ ишламиш акьас ве узуна гIуьфу ис алттархьухаб, дахьучин са муфеlетра кидава гикес. Ме тукун Iеламатвел — хьед адавай ери истти илгванде хъара цIае цIабара кегъучIа. Алоэйин цlабуъ аяф ахттигьар ая алиянас йирхlунарил, хьеттигI, сокаригI хъара чайигI агlатас.

Ги кумак аркьа ангина ая вахттуни, угубарин йирхlунарис хъара сасра итталарис ишламиш аркьай аве. Хьин вардиш хьуная алоэ аргвай тIагарихъ къабариъ, амма са пай тукар са Iайи бицIиттар ве, хуппай са-садар гьаваттар — цlегIуьфу митlри алеттар.

Ппараттарис агуная, фиштти тук кегъучIайчин, амма джаллабурис ягIайдава тукар гьер джуре рангаринттар вереф. Япониъ алоэ гьергелай ишламиш аркьай аве ямагаригI. ХьеттаригI, йогуртаригI алоэйин кьурцар гIихьуна э уха шейъэр аркьай авереф.

Авалдин заманайиъ четин и фикир акьас хулаъ алоэ адавай экьвас. Ме тук муфеlет кеяф идеф ягIайи хье хIабабарис димари. МигI гIая гьер джуре муфеlетин багьа витаминар. Гьалра гIелимари ягIар аркьай аме хъара фишттин иджвелин витаминар мик кейчин. ЯгIаттарикес: витамины А, Е, С, группы В, калий, кальций, магний, цинк, медь, природный антибиотик барбалоин, фруктоза, глюкоза хъара сасрабура.

Фармацевтари ацlуна муфеlет кея дарманар акьуная алоэйикес, гьер джуре гереквелдис. Ата рубар: бронхитар аяттарис, къарфун хъара улар иттаяттарис. Алоэйин гельди цIуппе аркьа иммунитет, мертт аркьа лекI. Алоэ вера фиттис кканчинара ишламиш акьас ве. Ичинара эхIттият акьуна кканде инсанди иджвел суман Iайвелра дахьас.

Жавгарат Хамазаева