Алчархьу балабур иджвелис хьуне

Магърибдин багухъ, варха шагьурдиъ, ахьуная ФатIима агъа са руш. Мин дадахъ хъахьуная са бицIисуман учин ттунар аркъа ус. Гьемилди и мебурин дуламиш. Са ягъарикес са ягъа дада пуная ФатIимайис: «ХIезур ухь, зе руш, хьин весе сасра хIуькуматиъди».

Белик тисаъ хъара идже хьас идефхьасе хьес. Завал акьуна чиппин тIакI-тIубучIра учIуне мебур рекуьъ. Ушуне мебур хIуьлилас. Iуьшан багамис хIуьл гъутуна, мебур ая гами адивуне. Джалла мисаъ аяттар адивуна, са ФатIима лепейи гIадихьуне къирагъихъди. Амурдиъ ачархьугуна фера квалди алдаминдавуйи мин. Уч фуш ичин, нандиас ичин.

Ушуная ме рекь ихьуна са багухъди. Са хубджи вахттунилас алчархьуне мис са касиб хал. Гисаъ аяттарис ме Iегвал хьуна ачатуне чиппин хулаъди. Ме хулан эессибурин дуламиш и ттунарин иш-пешайилди. Илгуне Iу-хьибу иса ФатIима мебурин хулаъ, кумак аркьай ттунарикес кьвадилкьванар ругъаc, масса ирцIанди дуламиш вей.

Са ягъа ФатIима ушугуна хIуьлин къирагъихъди, хъадикIине ме хIуьлил алвере къачагъари. Файшуна сасра шагьурди, масса йине мебури руш лукIвелди. Ме гъушу эесси руцай уйи учин гамибур аркьа усаъ кар аркьа инсандихъас. Мис ФатIимайин гьава агуф Iегвал хьуне. Сасра усаъ дала зе цехуниъ рехIет хьасе рушас пуна, гъушуне ми.

ФатIимара хъай хулаъди адигуна, унихьуне идемис, учин кIилди шейъэр ая гами фацунаяф хIуьлил алдея къачагъари. Учихъас лихандея инсанарис ирцIан кьимат хъундавай, кар аркьахъилди хьуне чиппи. Са вахттарилас ме эесси гьикуне ФатIима сасра хуькуматиъди масса йис чиппи акьуная гамибурин цIагъунар (мачты).

Хаб гъутуне хIуьл, адивуне ФатIима ая гами, са бахттунис гIаттархьуне ме. Экьуна кьирагъихъ Iешуне ме, фасегьан мидегьен бахтт кедаваф агъай уч, фасегьан кIилил мидегьен балабур алчархьаяф агъай.

Ме аттархьуная хIуькуматиъ сайисра ягъайдавуйи михъас. Амма джаллабур гъузуна уйи чадурар (шатер) аркьа са рушахъ. Иса сагелай цIае ади инсанар завал акьуна хабар гъуланди, гьанавас хьас ичин чадур акьас. Гьемиштти завал акьу инсанаригI гIачархьуне ФатIимара. ФатIимайи учивас хьасе пуна, башламиш акьуне чадур акьас.

Ке удигьай герек хьуне мис тIил. КIилди хIуькуматиъ руцуна джикIиндава тIил. КIвал хьуне ФатIимайис учис дада ягъар акьу ттунар аркьа пеша. Завал акьуна хIалатутин IуькI акьуне цIуьппе тIил. Хуппай герек хьуне мис цIуьппе кьумаш. Кьумашра джикIина адава мис. КIвал хьуне мис учин кьвадилкьванарин пеша.

Ругъуне ми цIуьппе кьумашра. Ахирахъди герек хьуне мис ирхе кIурар (шест). Ме кардис кумак хьуне цехуниъ гамибур аркьагунан пеша. Гьемебур джалла завал акьуна арайил хьуне мин чадур. Ми акьу чадур кьабул хьуне паччагьдис, фи кьимат кканде вас пуне ги. ФатIимайи пуне: «Зас экьвас кканде чве хIуькуматиъ». Тегунан хаб мич илгуне ФатIима ме хIуькуматиъ.

Ме ахттилатилди хьес аргвая, фи Iайвел алчархьучинра инсандил, хабди иджвелра хъая.

Луиза Гусукаева

Добавить комментарий

Ваш адрес email не будет опубликован. Обязательные поля помечены *