Агъуларин цIехьибу исан шиникквди адивая усаъ кумак акьуне хьибу исан шиникквдис

Хасавюртовский райондиъ, еридпе классиъ хурая Мухаммад-Ариф Гаджиева гIаттивуне хьеттигI адивая хьибу исан шиниккв. Ме кар хьуне Новосаситли агъа хIуриъ, еридпе классиъ ая шиниккв махьтабиди вея арайи. «Зун вей уйи махьтабиди. Зас ме ягъа вес кканди уйи джуре рекъуьас, амма фас ичин зун ушуне ме рекъуьас. Махьтабихъди рукьая вахттуни, зас агуне хьеттихъ хъая шиниккварин унар. Мебури агъаттар гъавурдиъ архьайдавуйи, гьараяр аркьай сайи фацуна уйи хьеттигI гIая шиникквдин гъил, амма мивас гIаттивас вей адавуйи. Сифтта, мебур агу вахттуни, зас дурхIаттар суман хьуне шиникквар», — ахъакьуне Мухаммад-Арифа.

Мухаммад-Ариф багуйи гьучушу арайи мис агуная кIил ахтт акьуна хьеттигI гIая бицIи шиниккв. Алттухъ фикирар дакьуна алчишина гIаттивуная ми шиниккв. ГIаттиву арайис ми эл гьартай андавуйи. ТегIди алзийиная Мухамад-Арифа мухурил, агъичиная хьед. Агъичи хьед хаб адавес ми хIеракат акьуна гъадаркуная бицIиф багулди. Ме арайи эл гьатуна улар дахъуная шиникквди. Уч амурдиъ ачархьичира, гуджар андавай хIел кендавуйи мик. Машиниъ гьаттвея идемис агуная мебур, гъурзар акьуна фи акьунаф ахтармиш акьуна, икIуна машиниъ файшуная больницайиди. Мухаммад-Арифан игит кардилди ме шиникквдин Iуьмур пуч хьундава.

ЦIехьибу исан Мухаммад-Ариф Агъул райондин ЧIаарин хIуриас э. Махьтабин хурубар кедавай, ми хьибу ис э Кьуран ягIар аркьай, бицIи хIефиз.

Луиза Гусукаева

Добавить комментарий

Ваш адрес email не будет опубликован.