ГIатIарин Нажмуттинанра Салиятан ке бицIи шиниккв Намруттин ягIа кIилди райондиъ. Ппара Iайи багъдин курариъ Iешкъ аяф э ге. БицIигунанхаб, учин ададахъ, гIатIарин Ибригьимахъ, хъуттурфанди, канверефи мис емишарин кьурарихъ ахъаджихIас.
ЙицIудпе класс кIиркIухаб, Намруттин ушуне Дербентиди хурас шоферарин курсар. Хаб адихаб, аркьай бицIи- цIуре курара, экьуне хIуриъ. ЦIемуед исар хьехаб, файшуне ге армиди. Армиас адина, са Iу иса хьуне Намруттин Ставропольский крайдиъ учин ччуччухъай, гис кумак аркьай. Сара, тидас адихаб, ге экьуне учин дадахъайна бабахъай, гебурис кумак аркьай хулан курарис.
Авала са бицIи кьурцIра хуппурин артафттавуйи дузуна. Узафра и калтуфарна, суьлна джарх. Намруттина хъучучIуне узас учин хулан удигь ая гIанаъ емишин кьурар.
Ппара гиранвейи мин бабас, ху чIир аркьая агъай, кIурар узай.
«Е зе баб, са-Iу кьур айя агъай хуппурар чIир верефттава. Фиркьа хье мидегьен калтуфарикес. Емишара иджи ду шиниккварис витаминар гьас», — агъай алартай хьуне ми гин хъел. Гьегебур аркьай, узуне ми учин гIанаъ кIилди емишарин кьурар. Тидас кул гIаттгъай, мидас тум гIаттгъай, акьуне ми учис кьадарин багъ. Намруттинакес хьуне багъманчи. Учин гIешкъунилди, фера дахуручира, ягIар акьуне ми кьаламар акьас кIурарин. Агьал Намруттинан багъдиъ гьер джурайин емишин кьурар ая. Са кIураник кейя гьер джурайин емишар, гьер джурайин сортар.
Джала инсанарис, агуттарис гин багъ, тамаш ве. Агъулаъ верефттавахи мишттин емишар, ага гебури. Ге багъдиъ айя ацIуна сортар гьечарин, хутарин, шафтталибур, бегIлибур, тIибитIар, тутар, хевар, машмашар, джимилар, джихерар, хъара гьер джурайин емишар.
Гебур кидай, гин багъдиъ айя хъара некьибура: малина, смородина, ежевика, еже-малина, клубника, крыжовник. Мебуринра айя гьер джура сортар.
Хьид хъучучIугъилди, уза Намруттина учин теплицайиъ гьер джурайин рассадабур. Гебурикесра, хъара сасра задара тин петтарисра ирцIанди ве ги. Фушра ги хъадикайдава дайина. Аметтари пулугьас ирцIанчин, ги ирцIанф гьавайи э.
Мирзабирин ШагIбанахъайра ариш-вариш аве Намруттинан. ШагIбанра э Iайи гIешкъар а багъманчи. Сад сайихъ хъадава сортар кIурарин, некьибурин духIубабур аркьайве гебури.
ХIуькуматин кардилра алдея ге. Намруттин э МФЦйин къаравул. Хъара диндинра цIуппе э ге. Вей гIелимарилди, ягIар акьуне ги учис Iераб чIалалди хурасра. АцIунгелай кьуръанра хуруфе Намруттина. Учин хьирра хъай хIедждалдира ушуне ге.
Намруттинахъра Джимилатахъ хъайя гIифу шиниккв: якьу рушна са кIирк. Iудара фиттикк кканчира хIав ккеттаре. ФитIуна, вецIар суман лиханттар э.
Нафият Шамсудинова
