Фи агъайчин агъулари каронавирусдихъас, вакцинацихъас зун ягIар акьуне хабар гъуршанди вакцина аркьаттаривас, акьуттаривас, хъара гьеге иттал хьуттаривас.
Ппара гагьди Типпигъарин хIуриъ ая больницайиъ кар аркьая медсестрайи Фатимат Гададовнайи мишттин хабарар аркьа вакцинацихъас: «Вакцинация – гьакIанф, Iайвел кидаваф инсандис са къайдайи гъайшиб аркьаф итталлин, фиштти инсан укъайчин итталихъай. Фидегьен хьин ме рубар йирхIучин, гьетидегьен хьин ухIа джалла хье багу — кIилинттара, хье хIуринттара. Гьеме пандемия COVID — 19 ая вахттуни вакцинация ппара Iайи иджи э акьучин. Ме руб йирхIухаб, итталин микьдар чIукь аркьа, хIеракатлу аркьа итталихъай укъа джандин къайдабур. ХIа инсанари сайихъра хъучудушуна акьуна кканде вакцинация. Джала Iемаларе, инсанари Iа ве агъаттар. Гриппинттар, туберкулездинттар, хъара ацIун итталаринра ягъдира аркьаттар ду хьин вакцинацибур? Мера гьегишттин са иттал э. Агьал ппара Iайи хьуная ме иттал. ХIаф, бициф дагъай иттар вея. Зун тIалаб аркьа джалабурис вакцинация акьас».
Типпигъарин хIурин больницайиъ кар аркьай ая медсестрайи Джамиля Гаджиевнайира ппара идже ахттилатар акьуне вакцинацихъас.
«Зун кар аркьагунан хаб аяфе вакцинабур. КIилди хIуригI гIаруцай аркьафи чин гьер джурайин вакцинабур. Мактабариъди, садикариъди верефи вакцинацибур акьас. Гьер вакцинайин учин иджвел ая. Хьин гьер иса аркьафе гьер джуре итталарин рубар. Ме коронавирус агъа итталинра ая учин вакцина. Интернетиъ ачика Iемаларихъ хъугъуна ккандава. Гьер инсанди, гьер джурегъилди э вакцина гъадиваф. Сурас Iайи ве, сурас рехIетти. Iайи зарар ирцIанф агъзуракес сайис э. Мункинвел иттар хьас вакцина дакьун ппара ая, варттал э акьуб, эхIттият акьуна. Хъара мункине, итта инсандин нае усак ягъниш кейчин, гьетисан иттал гъайшиб. Амма хIа пай иджвелдала вакцинацикес кедава. Иттал рехIетти алтвесе. Хье усаъ мехIелдис Iайи гьанасра хьуна адава. Дагулан итталар аяттарисра йирхIуная, фера акьундава гебурисра. Джаллабури чиппис иджедала хьундава агъайдава. Сайисра гучI мева, акье вакцинацибур», — агъа Джамиля Магомедовайи.
Хуппай зун хабар гъуйуне коронавирус хьун, сагъ хьуттаривас.
Шамсудинов Раджаб Шамсудинович, хье хIурин хIа идеми э. Ге ппара Iайи иттар хьуне коронавирус иттал куьркьуна. Гира ахъакьуне учин фикирар вакцинацихъас
«Акьуна кканде вакцинацибур джаллабури. Ппара Iа иттал э ме. ТIушас давей фаттархьуне зун ахунил, кIилин Iу хIефттайи. Фера IуьтIанасра ккан вейдавуйи. Фиттинра тIем ихьайдавуйи, ниъ вейдавуйи. Температурара Iайи гъайшина уйи зе. Эл гьатасра ппара четин вейи. Фидегьен дарманар IуьтIучира, рехIет вейдавуйи. Зун джалабурис акье агъа вакцинация, иттал киркьухаб, рехIети алттвес», – агъа Раджаб Шамсудинова.
Идже вакцинабур, кьацIраминдавай хъагъишаттар гьерттихъас адава. Ппара иджи дава курар ве иммунизацин кьабахъ вакцинацихъай идитIуттар. Вакцинация акьуна хьу итталар верш агъзургелайдегьен чIукь э садпегелай хьу итталарилас.
Гьер джуре диндин тIушубари акьас артайдава чиппин инсанари вакцинабур, алчихьай диндил.
Хъара ая политический кIапIалар вакцинацибур акьун ккандава агъаттар. МуфеIет кея вакцинайи ккедика иттал, артайдава кедишас сад сайикди, ппара хьас артайдава. Инсанари фикир акьуна кканде вакцинация аркьагуна, гин иджвелихъас, йиркIуралас гьатун кканде ге йирхIуна иттар хьасегьен агъа фикирар, дузвел дагIай агъаттарихъас.
Са пай дадар - бабарин фикир ве вакцинайи аутизм аркьаф суман, гIилмуйи дагъайчира.
ХIурариъ фидегьен ппара инсанари вакцина акьучин, мункинвел иттархьас чIукь хьасе. Ме руб йирхIуттарис кумак акьасе джандис укъас итталихъай, Iайи иттар дахьас. Вахттуниъ ай акьун кканде вакцинабур хIа инсанари. ЯгIайин ягъас ппара хIа гаф аркьа ме «Спутник V» агъа вакцинайин. ХIа инсанарис, 60 исалас вартт хьунаттарис акьас ахттигьар ая ме руб, микес фера Iайвел вейдава. Iари 2% инсанарис, вакцина акьуттарис, хьунаф чIирхIе джандис .
Гьегебура гьелидегьен Iаттар дава: вартт хьуна аве температура, Iуьр арка руб йирхIу усаъ, са чIукь чIирхIе ве джандис. Ая фера дахьуттара. Курбанова Тамам Давудовнайи, бициттарин мегIелимди, учис фера хьундава агъа ме руб йирхIухаб. Мирзоева Аминат Алиевнайи, филологди, учисра фера хьундава агьа.
Хъара фера дакьурай хье инсанарис. Джанди сагъвел хьурай. Итталар вархал хьурай.
Нафият Шамсудинова
