Магьа аргвай-даргвай са исна сур дегьен хьуная Украинайиъ спецоперация хъучучIуна. Фикир акьучин, са вахттра кехIей хьуна адава хье дадарин хIа дегIви ккиркIуна. Кьанди хье хIуькуматиъ хIа мегIракабур хьуне гъалибвелдин 78-ис хьубан. ХIисаб акьучин, са асир кехIей хьуна адава ме Iу вакъибурин арайиъ. ХIа дегIвин вахтт тарихдин вакъи хьуне дари дуньяйис. Те вахттари инсанарил алчархьу ягъарна Iуьшар хум вереттар дава. Инсанар мехIелдис амурди ачархьуна адава четин вахттар алттархьуна. Украина гъирхIирхьуна хьуне хье хIуькуматихъай душманвел аркьай. Ме СВО башламиш акьугъилди хье джигьилар ушуне Украинайиди ватан ухIас. Гьеме спецоперация хъучучIухаб ягъалас ягъа вартт вея санар ватан ухIас ушу джигьил аскерарин. Гьелбетта ме аскерарин джалгабуригI гIая игитар, зурбавелдин гьунарар акьу джигьил аскерар Дагъусттандис суман, кIилди хIуькуматиасра. Гьер са аскерди учин ватан бадала акьу загьмат амилгванасе багу-кIиларин, несиларин йиркIвариъ, мебурин Iуьмурдин тарих хьасе инсанарис
Гьеме санаригI гIая Агъул райондин гьер мукьариъ дуламиш вея джигьилар.
Гамидов ХIуьсейни IебдулгIезизович ягIайин ягъас иштараквел аркьая СВОйиъ.
ХIуьсейни уч хуф э Буршагъарин хIуриъ хIа хизандиъ. КIилди мебур ая йицIу шиниккв. Дадна баб дахи кIине ХIуьсейнин, те вахтуни ме цIеIу исан шиниккв и. ХIуьсейни муядпе класс ккиркIвасттегьен амилгуне Буршагъ. Хабди мебур айчIвуне Дербентский райондин Чинар агъа хIуриди. Аме классар махьтабин ми ккиркIуне Чинардиъ.
Махьтаб ккиркIуфна сад ме учIуне хурас Дагестанские Огни агъа шагьурдиъ «Профессиональный технический колледж» агъа мукьуйиъ. Колледж ккиркIуфна сад ушуне Iу истти аскервелди Приморский крайдин Уссурийск агъа шагьурдиъ. Хабди 2006-пе иса контракт хъитIуна ме ушуне старший разведчиквелди Хунзахский пограничный отрядиъ ФСБ РФ по Республике Дагестан. Гурджибуринра Дагъусттандин дазуйил. 2015-пе иса ХIуьсейни хьуне Гудермес агъа шагьурдиъ.
2018-пе исалас 2019-исалди рукьуна ме хьуне Сириъ.
2021-пе иса февральди вазала хье хIуькумати хъучучIуне Украйинайихъай спецоперация.
Хулаъ хизанра, Iуд бицIи шиникквара атуна, ХIуьсейни учин разивелди ушуне СВОйиди ватан ухIубан рекъуьъ дженг дивас.
Михъна мин хизандихъ хъая ХIемидна Кьурбан агъа шиникквар. Iудар шиниккварис ттурар йине ХIуьсейни учин хIададаринттар. Са хIадад мин, Абдуразаков Кьурбан, хIа дегIвиъ дженг дивуфе хье ватан бадалди. Гъушуне зурбавелдин джевизар. ХIуьсейнин чIаларилди, хIададарин зурбавелдин гьунарар, ватан бадала диву загьматар, лапп хIа дамакъин кар э зас суман, зе шиниккварисра, гьалдихъас хаб вере несиларисра. Хуттуларира дамакъ аркьа учин хIададарин зурбавелдин гьунарарилас. Мин ке хIа мурад, матIлаб э учин хIададас ухшар хьуб, хIададас суман ватан бадалди загьмат дивуб.
Хулаъ ХIуьсейнихъ сабур фай гъузуная шиниккварна хизанар, хъара багу-кlилар. Сагъ-саламатдалди адирай хье кIилди джигьилар чиппин ватандиди. ИслехIвел хьурай дуньяйил инсанарин йиркIвар сакин хьас.
Наибет Гасукаева
