ЧIирин гитан хIисаб аркьа гитанарин тумуникес, амма джанарин уч хулан гитанарилас азманди э. АцIуна джуревелар ая гебурин: ибрарин кIекIварил алдея хьейин чIичIар, рангар, лекара суьве э гин. Сае нахширар суман кIаратIилди дуламиш верефттава чIирин гитан. Дагьарариъ, дарариъ сатти кIил ухIа ми.

АцIуна ибхьер угъугуна ппара гьучархьа чIирин гитанар. Лекарин кIенарик ккея хьейи кумак аркьа гебурис адархьас ибхьиъ. Iу-хьибу джуре рангарин чIирин гитанар гьучархьафи: чIиреттар, хъуьхъеттар, чуллеттар, амма гIунарик хIаттар, лекарик бицIиттар кIаре тIам-тIамар джаллабурик кеве. Ппара Iайи зиринг гIурчахъан хIисаб аркьа ме нахшир. ГIурар, Iулар, джакьвар, — гьер джурайин бицIи нахширар фарцанди дуламиш верефе. Евразияйиъ ая чIирин гитанарифас миргара фацанас ве. Iу митIри вартт кегъишина джакьвар фарцанде мебури.

Къафланарифас, асланарифас суман ппара гагьди ахъихьас вейдава гебурифас, амма чIирин гитани ккекьуна фарцанде джуре нахширар. Чиппис Iелеф хьас арабур аркьай дарарилдира алгъучIай аве ме гитан. ХIуьтте силебарилдина къармахарилди рехIетти кIес акьас вей чIирин гитанифас. Амма чиппилди гIурч аркьай нахширар авей. ХIучар ая усариъ ппара бадил вейдава ме.

ХIуригьди багу хьугуна, малар, хIуппар фарцанди инсандисра зарар аркьа чIирин гитани. БатIар кьудакьихъас инсанари ппара къирмиш аркьа ме нахшир. Тум чIукьди алттвей, къирмиш ппара аркьагуна, Красная книгайигI гIачихьуна ая чIирин гитан.

Гьелегуна тIалаб э гIурчахъандисра, гъилиф яракь фаяттисра, багьана кедавай, ме нахшир кIес дакьас. Инсанари духIучин дуьнья, сайира ухIасттава.

Расим Гучудадов