Хье Ватанди хIа дегIвиъ гъалибвел гъушуна алттушуная 78 ис. Фидегьен вахттар ушучира, инсанарин йиркIуралас, фикирариас хум ушуна адава. Хье хIуькумати ме дегIвин дард киркьуне гьер са миллатис, гьер са хIурис, гьер са хизандис. Са пай инсанари йине чиппин Iуьмурар ватандихъас, са пай саламатдалди рукьуне чиппин хизанарилди, са пай сагъсузди рукьуне, са пай фиштти хьуф ичира дагIай вакьфа хьуна гулуне. Мишттин тарихдин вакъиа, гъалибвел бадалди чиппин
Ватан ухIай Iуьмур йиная игитарин, зурбавелдин ттур ая аскерарин, машгьурвел хьуне хе хIуькуматис суман дари дуньяйис. АцIуна исари хье хIуькуматтихъай душманвел аркьай гъутуна уйи Украйина. Мисан хIаттари джин даркьай агвар аркьайи чиппин душманвел, са хъитIу маслихIетра бегьем акьас алучIай давуйи. Мебури аркьаттар аргвай, хье хIуькумати башламиш акьуне СВО. Гьер са республикайиас, шагьурариас, районариас файшуне джигьил шиникквар СВОйиди. ЯгIайин ягъас хье Агъул райондиъ гьер са хIуриас ая СВОйиъ джигьилар, чиппин аскервелдин бурдж ирцIанди, ватан ухIай. Ая зурбавелдин, игитвелдин гьунарар агвар акьуттар. Гьеме СВОйин аскерарин джаргабуригI гIай уйи Вадим Магомедовра. Гьеми бахилди кIвал аркьа хIа дегIвиди ушу чиппин хIададан тарих. Фас пучин, мин хадада Магомедов ШагIбана иштарак акьуфе Ватандин хIа дегIвиъ.
Миштти идегуна, чин кIвал акьуна ликIенасе ЯрIугIарин хIуриас дегIви ушу Магомедов ШагIбанахъас.
Магомедов ШагIбан хуфе 1913-пе иса Агъул райондиъ ЯрIугIарин хIуриъ Iеджис гъизандиъ. Дадас ШагIбанан агъайи МехIемад, бабан ттур и Пери, Арсугъарин хIурин дишагьли. Амма дадна баб дахи кIине. УхIуне ШагIбан адада Базайрамазан агъатти. Чуппар, чияр мин бицIи ами кIине, чIирхIе итталар гIаттина, духттурарин кумак, дарман вахттуни дахьуна. Четин гашин заманайин вахттар и те исар.
ШагIбанан 27 ис хьугуна, адада акьуне мисс хизан ФитIарин хIуриас Гюльселем Магадаева агъа дишагьли. Са вахттра дахьуна, ШагIбан Магомедов 1941-пе иса файшуне дегIвиди. Гьер мукьариъ хьуне ме. Ахиран исари удигьай Украинский фронтиди аттархьуне, хабди 2-пе Белорусский фронтиъ танк гьикаф хьуне микес. Танкунин люк дархъа вахттуни гулла киркьуна хьуне мин гъилис йирхIун.
1945- пе иса ШагIбан адине хулади.1946-пе иса сифтта мебурихъ хьуне руш.КIилди шиникквар мебурихъ хьуне 2 рушна гIуьфу кIиркI. ЯгIайин ягъас кIилди шиникквар сагъди ая. Шиникквари кар аркьая махьтабиъ.Шибер ухIай чиппин хизан хулаъ ая. Хъара ШагIбан Магомедовахъ хъая 40 хуттулар. Мебур э чиппин хIададан зурбавелдин ттур ухIаттар.
КIине ШагIбан 1987-пе иса.
Гасукаева Наибет